Машкврахъди тебрик апlура

РД-йин муфтий шейх Аьгьмад-афандийи тебрик апlура

«Ассаламу аьлейкум ва рагьматуллагьи ва баракатугь! Гьюрматлу гъардшар ва чйир! Вари мусурмнар улубкьурайи гирами машкврахъди кIваантIан тебрик апIураза. Му ваз къаршуламиш апIуз мумкинвал дубхьну, ушвар дисузра мумкинвал тувбан ихь Агъайиз гьямд ибшри.

Гьацира ухьуз таравигь-гъудгнар апIуз, сатIиди ифтарар апIуз мумкинвал тувбазра Аллагьу Тааьлайиз гьямд ибшри. Гьаму вазли ухьу апIурайи ужувлан ляхнар давам дапIну ккунду ва Аллагьу Тааьлайикан ухьу чIуру ляхнарихьан уьрхюб ккун апIидихьа. Гьюрматлу мусурмнар, Аллагьу Тааьлайикан му вазли ухьу гъапIу ужувлан ляхнар, гъидису ушвар, туву ушварин сэъ ва имбу хайирлу ляхнар кьабул апIуб кIваантIан ккун апIураза. Гъит Аллагьу Тааьлайи гьарсаб гъапIу ужувлан ляхнарихъан гизаф кьадар артухъ савабар туври, гъит гъюру Рамазандин вазра ухьу гьамци шадди адапIруганси ибшри! Гьарсариз Аллагьу Тааьлайин рягьимлувал, жандин сагъвал, кIван шадвал ккун апIураза».

Урусиятдин мусурмнарин Духовный собраниейин муфтий Альбир хазратди тебрик апlура

Урусиятдин мусурмнарин Духовный собраниейин терефнаан ва гьацира йиз терефнаан вари мусурмнар улубкьурайи Ид аль-Фитр машкврахъди кIваантIан тебрик апIураза!

Му гирами машквар Рамазандин ваз ккудубкIбахъди аьлакьалу ву. Му ужувлан ва рягьимлувалин машквар ву. Нубатнан ражари Аллагьу Тааьлайи ухьуз му гирами ваз къаршуламиш дапIну, ушвар дисру, ибадат апIру, гъардаш’валин аьлакьйир ижми апIру, гунгьарихьан жвуван юкIв марцц апIру ваз ву. Аллагьу Тааьлайин амрихъди, Пайгъамбарин рякъ дибисну, ухьу ужувлан ляхнар апIурхьа, мюгьтаж’вал айидариз кюмек апIурхьа. Вари мусумрнариз машквар вуйи йигъанра ухьу вари хизанариинди уч духьну тебрик апIури, мирасар-багахьлуйирихьна гъягъюри ва дурар тебрик апIури шулхьа. КIваантIан вари мусурмнариз ужувлар, кIван шадвал, жандин сагъвал ккун апIураза! Гъит му ужувлан машквар хъанара ижмиди мусурмнар сатIи апIуз себеб ибшри! Гъит Аллагьу Тааьлайи ихь гъидису ушвар, ужувлан ляхнар кьабул апIри! Амин!

Татарстандин муфтий Камиль хазратди тебрик апlура

Ухьуз фукьан ккундаршра, магьа 1442-пи йисандин Рамазандин ваз ккудубкIну. Сабуну гьядисдиъ дупнайиганси, «эгер инсанариз Рамазандин вазлин вари заанваларикан аьгъяйиш, дурариз думу гьаргандиз гъубзну ккун шуйи». Магьа ихь улихь машквар дугъубжвна. Татарстан республикайин Духовный управлениейин ва йиз терефнаан вари мусурмнар гирами машкврахъди кIваантIан тебрик апIураза!

Рамазандин вазлин вари 30 йигъандин муддатнаъ ухьу шлукьан гизаф Кьур’ан урхуз, лайикь вуйиси ушв бисуз, ужувлан ляхнар артухъдиси апIуз чалишмиш шулахьа. Аллагьу Тааьлайи ихь гунгьарин аьфв дапIну, ужувлан ляхнарин артухъдиси савабар тувуншул кIури, умуд киврахьа, ин ша Аллагь. Сабуну гьядисдиъ дупнаки: «Ушвру ва Кьур’анди Гъиямат йигъан лукIрахъан шафааьт апIур. Ушвру пиди: «Я Рабби! Узу му кас ипIрубдихъ ва убхърубдихъ йигъандин вахтна мягьрум гъапIунза, дугъхъан шафяаьт апIуз мумкинвал тува!» Кьур’анди пиди: «Я Рабби! Узу думу йишвандин нивкIухъ мягьрум гъапIунза, Дугъхъан шафааьт апIуз узуз мумкинвал тува!». Гьарсар кIваантIан ибадат гъапIуриз, ушв гъибисуриз му шафааьт шул кIури, умуд кивраза. Гирами машквар йигъанра ухьу гьаму ляхникан ккун апIидихьа.

Мусурман касди, машквар ккудубкIубси, му ляхнар дирчну ккундар. Пайгъамбари гъапну: «Шли Рамазандин вазли ушвар дидисну, хъасин Шаввалин вазликанра 6 ушв гъидисиш, дугъу вари йисан ушвар гъидисгансиб саваб шул». Гьаддиз мициб мумкинвалра ккадапIуз хай даршул. Му гирами машквар гюрюш апIури, гъачай, сарун чIуру ляхнар, гунгьар дарапIуз ижми ният апIухьа. Гъит ухьуз варидариз Аллагьу Тааьлайин разивал, дугъан Рягьимлувал, ижми иман ва Ислам диндин рякъ ижмиди бисуз тавфикь туври! Амин!

Муфтийихъди гюрюш

23-пи апрелиъ «Ассалам» газатдин редакцияйин Дагъустандин Муфтий шейх Аьгьмад афандийихъди гюрюш гъабхьну.

Душваъ газатдин вари редакторар иштирак гъахьну. Дупну ккундуки «Ассалам» 13 жюрбежюр чIалариинди удубчIвура. Редакцияйин гъуллугъчйири Дагъустандин муфтийиз чпи гъабхурайи ляхникан яркьуди ктибтну. Чан нубатнаан Муфтийи уч духьнайидариз гъабхурайи ляхнин чухсагъул къайд гъапIну ва му ляхниъ хъанара артухъ аьшк кади лихуб ккун гъапIну. Серенжемдин аьхириъ Муфтийи жюрбежюр чIаларин газатарин редакторариз пешкешар тувну.