Имамари Рамазандин ваз мубарак апIура!

Аьзиз ватанагьлийир! Ухьу ккилигурайи, ухькан гьарсарин кIваз хуш вуйи гирами ушварин Рамазандин вазлихъди учву вари кIваантIан тебрик апIурача! Аллагьу Тааьлайи му ваз мусурмнариз аьхю пешкеш вуди дебккна. Гирами Рамазандин ваз ккебгъру ва ккудубкIру йигъари саб гъулаъ яшамиш шулайи мусурмнар, сатIи духьну, садакьа туври, накьварихъна гъягъюри шулу. Пайгъамбарин ﷺ гьядисдиъ дупнаки, женнетдиъ «ар-Раян» кIуру раккнар а, душв’анмина анжагъ ушв гъибисдартIан гъягъидар, дурариз дидхъан саваб вуди Аллагь ﷻ рякъиди. Гьацира дупнаки, ушв гъибисуриз кьюб жюрейин шадвал а: ушв гьибтувалин шадвал ва ушв гъибисур Аллагьу Тааьлайихъди гюрюшмиш шлуб аьгъювалин шадвал. Мусурман касди ушв дибиснайиган, дугъкан разивал улупури, Аллагьу Тааьлайи Чан малаикариз кIуру: «Малаикар, ари магьа гьамцир ву Йиз лукI, Узу бадали дугъу я ипIурадар, я убхъурадар…». Гъит ухьура Аллагьу Тааьла рази ктаърударикан, Дугъан разивал абгрударикан ишри!

АНСАР РАМАЗАНОВ

ТАБАСАРАН РАЙОНДИН ИМАМАРИН СОВЕТДИН ПРЕДСЕДАТЕЛЬ

Аьзиз гъардшар ва чйир! Пайгъамбарихъанмина хъюгъну, хъа дугъан асгьябар, табиинар, адлу аьлимар ва ухьу аьдати инсанар Рамазандин ваз багахь гъабхьиган гизаф шад шулхьа. Аллагьу Тааьлайи саб тикисибкьан имандин пай тувнайи кас му ваз багахь шлуган ясана улубкьган, рази дархьиди гъузидар. БицIивахтнахъанмина ухьуз ихь абйир-бабари ушвар дисури гъяркъган, ихьра зурба аьшкь шуйи, ухьузра, вари йигъан шулдарш, лисузкьан ушв дибисну гъузуз ккунди шуйхьуз. Ари гьадму ляхнар вари имандилан асиллу ву. Гьаддиз ухьу ихь веледаризра диндихьна гьамциб аьшкь улупну ккунду. ДумутIанна гъайри, му ваз дюаь кьабул апIру, туба кьабул апIру, ужувлан ляхнарихъан саваб артухъдиси тувру ваз ву.

АЬБДУЛЛА МАЛИКОВ

ДЕРБЕНТ ШАГЬРИН ИМАМАРИН СОВЕТДИН ПРЕДСЕДАТЕЛЬ

Гьюрматлу ватанагьлийир! Рамазандин ваз ухькан гьарсар касди, юкIв дахабгнайиганси, гюзлемиш апIурайиб ву. Му вазлин заанваликанна фазилатваликан саб бицIи макьалайиъ дупну ккудубкIуз шулдар. Йигъар-вазар гъягъюра, ихь уьмурра яваш-явашди чан аьхирихъна рякъюъ а… Му ихь уьмриъ Аллагьу Тааьлайи ухьуз сабсана ражну гирами Рамазандин ваз гюрюшмиш апIуз ва му вазлин арайиъ шлукьан гизаф ужувлан ляхнар апIуз мумкинвал тувбан гьямд апIурухьа. Гъит Аллагьу Тааьлайи ихь ктучIву гунгьарин, гъалатIарин аьфв апIри, ухьу женнетагьлийирикан апIри ва гъит ихь аьхиримжи гафар «Ла илагьа иллаЛлагь» келима ибшри!

ШЯБАН САЛИХОВ

ХИВ РАЙОНДИН ИМАМАРИН СОВЕТДИН ПРЕДСЕДАТЕЛЬ

Аьзиз халкь! Сабпи нубатнаан, гьямд ибшри Аллагьу Тааьлайи ухьу мусурмнар вуди халкь апIбан. Думу ухьуз варитIан аьхю ниъмат ву. Аллагьу Тааьлайи ухьу Чав кIваин хру халкьдикан гъапIну. Му гирами вазра ухьуз аьхю ниъмат ву. Гьаддиз ухьу му вазлихьна жвуван терефнаанра гьюрмат дюуьбхну ккун. Гьюрмат шулу, эгер ухьу ушвар дисури, гъудгнар апIури, кьаза гъудгнар каш, дурар ккаъри, ужувлан ляхнар апIури, гъуншйириз, багахьлуйириз, мирасариз кюмек апIури гъахьиш. Уьмур саб бицIи вахтнан манзилсибтIан дар, эгер думу манзилнаъ ухьу ужуб терефназди ликар алдадагъиш, думуган тмуну дюн’яйиъ читинди шул, гьаддиз хъачай бицIи манзилнаъ алдагъру ликан ужуб терефназди алдагъурхьа аьхират ужуб хьпан бадали.

МУГЬЯММАД КАДЫРОВ

ОГНИ ШАГЬРИН ИМАМАРИН СОВЕТДИН ПРЕДСЕДАТЕЛЬ