Суал-жаваб
- Хизандиъ гьамциб суал арайиз дуфнайич. Хулаъ саб миллионна гьацl дивна. Жилириз гьаму пулихъ гьяж апlин кlураза, хъа дугъу ихь пул адарихь кlуру. Хъа гьаму айибдихъ гьяж апlин гъапиган, гьацибра пул хилиъ адарди гъибтуз даршул кlури, гиран апlуру. Гьамциб пул дивну гьяж дарапlувалиан гунагь айин?
Гьяж инсандиина фарз хьпан бадали айи шартlарикан саб пулин дакьатар ади хьуб ву. Эгер инсандиз дициб мумкинвал аш, дугъу гьяж тамам дапlну ккунду.
Мициб кьадар пул хулаъ ади ва гьаци вушра гьяж тамам дарапlди му жилилан гъушиш, Аллагьу Тааьлайин улихь гьяж тамам дарапlувалихъан жаваб тувуб алабхъуру. Гьяйифки, гизафдари жандин сагъвалра ади, пулин мумкинваларра ашра, гьяждиз гъягъбахьна жавабдарвалиинди лигурадар. Гьаддиз жилирихъди хъанара гаф-чlал апlинай, хъа лазим гъабхьиш, имамдикан, аьлим касдикан дугъахъди сюгьбат гъабхуб тIалаб дапIну ккунду.
Инсандиз, чав му жилиин илмиди, жвуван аьхиратдикан фикир кади духьну ккунду, ил ктабгъру вахтна фикир гъапlну кlури, чlяаьн шуладар.
- Саспи йишвариъ диндин къанунарихъди вуйи рассрочка а. Амма дурарихьанмина саб фукlа гъадабгъруган, процентар али банкдихьантlан артухъ харжар удучlвуру. Гьаци вуйиган думу диндихъди вуйи рассрочка шулайинхъа? Йиз фикриан, душваъра процентар ишлетмиш апIурашул.
Ав, гъи жюрбежюр йишвариъ диндиъ улупнайи къайдайиъди рассрочка ишлетмиш апIури шулу. Думу рассрочкайинна банкдиъ туврайибдин фаркьвал гьаддиъ вуки, мушваъ дурарин увуз вуйи шейъ-мутму, ясана жараб фукlа сабпи нубатнаан чпиз гъадабгъура, яни дурарин эйсйир шула, хъасин гьадму мутму чпин кьиматназ увуз массу тувра, мушваъ гьярам вуйиб фукlара адар. Учву йикьрар апlруганра, душваъ процентар кlурадар, дурари чпин мутму увуз чпи тяйин дапIнайи кьиматназ тувра. Думутlанна гъайри, диндин рассрочка айи йишваъ, эгер увхьан вахтниинди пул тувуз дархьиш, процентар иливурдар, кьимат чан кьиматди, дигиш даршиди гъубзру. Хъа банкдиъ дурари иливурайи процентарихьна хъана артухъ процентар иливуз хъюгъру, натижайиъ кьимат мялум дапIнайибтIан кьадарсуз артухъ хьуб мумкин ву.
Му суалнаъ хъанара жара месэлйирра а, гьаци вуйиган аьлим касдихьан гьерхиш, ужи ву.
Йиз веледдин ччвур мусурман ччвурарикан дар. Думу вахтна гъийин йигъанси му ляхнарикан мялумат адайи ва гьарури чаз кьабулди вуйи ччвур туври шуйи. Хъа гьамус, диндкан аьгъю шули, жюрбежюр фикрар арайиз гъюру. Гьамусяаьт йиз бализ чазра веледар а, амма узуз гиран шул кlури чан ччвур мусурман ччвурназ дигиш апlурадар. Гьаму дюшюшдиъ узу фици гъапlиш, ужи шул?
Дугъриданна, улихь вахтари аьгьвалат гьациб вуди гъабхьну, хъа гьамус диндикан аьгъювалар артухъ шули гизафдари, чпин улихьна али ччвур алдабгъну, мусурман ччвур иливури шулу. Думу дюз ляхин ву, ва веледдиз ужуб мусурман ччвур тувуб абайина бабан буржарикан ву. Гьаддиз думу ляхниз уву яв терефнаан сабпирди гаф гъапиш, хъанара ужи хьибди.
Пайгъамбарин ﷺ гьядисдиъ дупна: «Аллагьу Тааьлайиз варитlан ккуни ччвурар Аьбдуллагь ва Аьбдуррягьман ву»
Пайгъамбрарин ччвурар тувубра лап ужудар ляхнарикан ву. Аьйшайи ктибтураки, Пайгъамбари ﷺ ужудар дару ччвурар алидариз мусурман ччвурар туври гъахьну.
Жилирихьан жара хьуз ният айиз, амма веледарин язухъшнаан сабур апlураза. Саспи дюшюшариъ лапра читинди шулу. Гьамци сабур апlбаан саваб айкlан?
Аллагьу Тааьлайи хъанара артухъ сабур ва албагувал тувну, ичв хизандиъ берекет, шадвал, ислагьвал ибшри. Ав, уьмриъ гизаф читинвалар алахьури шулу, хъа эгер Аллагь бадали думу читинваларикк ккюгъри гъахьиш, савабра артухъ хьибди. Хизандин институт аьхю жавабдарвал айиб ва читниб ву, гьарйигъан сабур апlури, чиб-чпихъди ужиди янашмиш хьуз аьхю фикир тувну ккуни дюшюшар а. Гьаддиз, гьюрматлу чи, шлубкьан сабур апlин, Аллагьу Тааьлайикан ичв арайиъ масляаьт хьуб ккун апlин. Аллагьу Тааьлайи ихь дюъйир жавабар адарди гъитурдар, гьаддиз шлубкьан артухъ дюъйир апlин.
