Йиз веледарихъан дерд казуз
Ассаламу аьлейкум, аьзиз мусурман гъардшар ва чйир! Гьаму газат урхури гизаф йисар вуйиз. Магьа узура йиз кlваъ айи дерднакан учвуз мялумат тувбанди гъахьунза.
Аьхиримжи вахтари ихь гъюрайи насларикан, аьхю шулайи веледарин яшайишдикан гизаф фикрар апlураза. Гьадрарин арайиъ кlакlнаъ ади - йиз веледарикан. Фу дубхьнайкlан мурариз? Гьаз мукьан азгъунди вуйкlан? Саспидарипи диндихъ хъача кlуру, амма саб ляхин гъабхьиган, мурарин динра кlваълан гъябгъюру.
Улихьнаси магьа ич хулаъра диндин гьякьнаан гаф-чlал гъабхьиган, йиз бали диндиъ бид`аь ляхнарикан улхуз хъюгъю. Мугъан гафариинди, ихь улихь гъахьи ксари апlру ляхнар вари диндиъ адрудар ву, чпиз аьгъдарди апlури гъахьидар ву, мавлидар хай шулдар. Гьеле йиз бализ гирами Калам урхуз аьгъдаршра, диндин саб жюрейин аьгъювалар адаршра ва чаз ккуни вахтна гъудган апlури, имбу вахтари дарапlди айи касдира гьамци кlураган, гизаф фикрарикк ккахъунзу. Хъа мици кlуру жигьилар гизаф адаринхъа? Гьаму имбу жигьиларра гьамцдар вуйкlан? Дарш йиз бай сар гьамцир вуйин? Йиз фикриан гъи гьаму хай шулдар, гьатму диндиъ айиб дар, кlурудар вари я дин аьгъюдар дар, я диндихъди гъягъюрайидар дар.
Гьаму яшариз дуфназа, ва уьмриъ ужубра, харжибра гизаф гъябкъюнзуз, хъа мициб аьламат, яни жвуваз фукlара аьгъдарди, амма аьгъюдаритlан ягъалди гафар апlури хьувал ужувлаз дар. Улихь вахтари накьварихъ вушра, саб серенжемдиъ вушра диндин гьякьнаан анжагъ аьгъю агьларитlан гафар апlурдайи. Гьамус аьгъюдарихьди гафкьан апlуз гъитрадар. Гьарсар гъудган апlуз хъюгърайириз учв аьлимси рякъюра. Чав апlурайиб варитlан марцциб вуди, гьякьлуб вуди рябкъюра.
Я Рабби, кlураза, эгер мурариз сацlибкьан диндин аьгъювалар айиш, диндикан хабар айиш мукьадар халкьдиз къаршуди удучlвуй кlури фикир дариз. Гьаз гъапиш диндиъ гьарган мясляаьтнахъна теклиф апlура, хъа му жигьиларин, чпитlан гъайри, сарун фужкlара адар кIури фикир ву.
Сабпи нубатнаан, йиз веледариз, хъасин имбударизра кlураза: гьялак махьанай, думу рякъ учву дар кlурудари дивнайиб ву, ва думу учвхьан дигиш апlуз шлуб дар.
Сабан жвуван фарз гъудган апlуз гьякьлуди дубгъуб герек ву, хъасин яваш-явашди имбу фарзар ва суннатар, гьамрар аьгъю гъапlган хъасин учву гъи улхурайибдиканра мялумат шулчвуз.
Гъачай ихь уткан дин, ихь Пайгъамбарин ﷺ рякъ айибси гъибтай. Ав, учву суннайихъди гъягъюрача кlурачва, амма суннайихьан гизаф ярхла вучва.
Гъит ихь варидарин гележег акуб ибшри!
