Дербент шагьриъ аьхю серенжем
Дербент шагьриъ аьхю серенжем
Пайгъамбар ﷺ бабкан гъахьи вазлин вари муддатнаъ ихь уьлкейин жюрбежюр йишвариъ мажлисар-мавлидар кlули гъушну.
Ихь халкьдин агьалйир артухъдиси яшамиш шулайи йишвариъра, ихь имамар-аьлимар гъягъюри, мажлисар гъухну.
Дурарин арайиъ Москва, Челябинск, Екатеринбург, Казань ва гьацира жара шагьрар а.
Дагъустандиъра кми-кмиди вари шагьрар-гъулариъ мажлисар гъахьну.
Дурарикан варитlан аьхюб Мягьячгъала шагьрин площаддиин гъубху варидагъустандин мажлис гъабхьну.
Душваъ Дагъустандин муфтий шейх Аьгьмад Афанди, Исламдин илмарин докторар ва гьацира вари республикайиан имамар, аьлимар, жямяаьтлугъ тешкилатарин вакилар иштирак гъахьну.
Кьибла Дагъустандиъра Дербент шагьриъ аьхю серенжем гъабхьну. Душваъ гизафси аьлимари, Гирами Каламдин аятар урхури, насигьятар туври гъахьну.
Дербент ва Дербент райондин имам Аьбдулла Маликовди вари уч духьнайидариз чухсагъул къайд гъапlну ва муфтиятдин терефнаан Вариурусиятдин жигьил аьлимарин талитнаъ гъалиб гъахьи Закир Идрисовдиз пешкеш тувну. Гьамцдар жигьил аьлимар арайиз гъюри, Ислам дин хъанара гужал шул, иншаАллагь.
Мажлиснаъ иштирак шулайи диндин илмарин доктор Мугьяммад Мягьяммадовди гирами Каламдихьна дубхьну ккуни гьюрматнакан ва, Гирами Каламди ухьуз фициб мяна ачмиш апlураш, гьаддикан яркьуди ктибтну.
Мажлиснаъ бицlидари Пайгъамбарикан ﷺ шиърар урхури, варидари сатlиди Пайгъамбариина ﷺ салаватар хури гъахьну.
Мажлиснан аьхириъ варидари сатlиди дюаь гъапlну ва Аллагьу Тааьлайикан гележегдиъра гьамцдар серенжемар кlули гъахуз кюмек ккун гъапlну.
