Мясляаьтнан йикьрар
Натат гъулхьан
Ярхла дарди
Бина гъиву
Мусурмнари.
Кьушмиъ гьарсар
Чан ляхнихъ хъа.
Хабаб Мунзир
Ву кlурайир
Ихь Пайгъамбриз
(Салават ва
Салам дугъаз):
– Я, Аллагьди
Гьаъну айир!
Гьаму ухьу
Бина йивну
Айишв уву
Ктабгънийва, дарш
Теклиф вуйин
Сар Аллагьдин?»
– Узу ктабгъуб.
– Душмнин чlимрар
Хъуркьуз мумкин
Ву ухьухьна.
– Дюз кlурава.
Цlибди ярхлаз
Гъубху бина
Мусурмнари.
Наим гъала,
Ягъли цалар.
Йигъан-йигъан
Тlирхури а,
Мархьси, чlимрар
Гъалайиан.
Мусурмнари
Тувуй жаваб,
Амма женгнаъ
Саб жюрейин
Дигиш`валар
Шуладайи.
Кlур Пайгъамбри
(Салават ва
Салам дугъаз):
– Закур пайдагъ
Тувидиза
Вартlан Аллагь
Ва Пайгъамбар
Ккунирихьна.
Гьарсар ансар
Ва мухаджир
Гьязур вуйи
Бисуз пайдагъ.
Гвачlин гъабхьи.
Кlур Пайгъамбри
(Салават ва
Салам дугъаз):
– Наши Аьли?
– Дугъан улар
Иццури а,
Уьру духьну, -
Шли-вуш гъапи
Эскрарикан.
Ихь Пайгъамбри
(Салават ва
Салам дугъаз)
Аьлдиз чахьна
Дих гъапlнийи,
Уларикан Аьлдин
Чан пак шириш
Кадатнийи,
Сар Аллагьдиз
Ккарагури,
Гъурху дюаь.
Аьлдин улар
Гъахьнийи сагъ.
Ва Аьлдихьна
Туву пайдагъ
Ихь Пайгъамбри
(Салават ва
Салам дугъаз).
Ихь Пайгъамбри
(Салават ва
Салам дугъаз)
Гъапиганси,
Гьюжум апlуз
Ккебгъру вахтна
Аьлди теклиф
Диву душмниз
Ихь ислам дин
Кьабул апlуб.
Амма жугьдар
Рази дайи.
Хъа гъалайиъ
Фужкlа адар –
Хпар, бицlидар
Ширкк гъалайиъ
Дапlна фаркьат.
Душман гьязур
Духьна дикъат,
Уьбхюз кlури
Наим гъала.
Магьа жугьуд
Мархаб кlурур
Ал гъалайин
Цал`ин, дугъу
Мусурнариз
Сарна сарди
Вуйи кчlихбаз
Дих апlура.
Удучlвнийи
Кчlихбаз Амир,
Амма дугъхьан
Гъабхьундайи
Жугьуд йикlуз.
Хъасин кчlихбаз
Удучlвнийи
Аьли. Дугъу
Дишла гъиву
Душмниз гъилинж,
Зиян гъапlу,
Кьюбпиб гъиву –
Ултlубччву кlул.
Хъасин гъафи
Мархабдин чве
Ясир кlурур
Кчlихуз Зубайр
Аввамдихъди.
Ясиринра
Гъабхьи кьисмат
Чвуччвунсиб чан.
Ккебгъу дяви
Лапра гъизгъин,
Гьарйин, чlигъар
Айи аьршдиз.
Мусурмнари,
Гьюжум дапlну,
Уршвури а
Хаин душмнар.
Хайлин адлу
Жугьдар душваъ
Гъийихнийи.
Дябкъну гъалиб
Шлуб мусурмнар
Амриинди
Сар Аллагьдин,
Гьергу душмнар
Гъалайиан
Саъб гъалайиз,
Девлет, гъизил,
Яракь ипlруб
Дипну мушваъ
Мусурнариз.
Мусурмнари
Шубуд йигъан
Кьялаъ тlапlу
Саъб гъалара.
Ва шубудпи
Йигъан магьа
Ихь Пайгъамбри
(Салават ва
Салам дугъаз)
Ккун гъапlнийи
Аллагьдикан
Кюмек тувуб
Мусурмнариз.
Ва ккебгънийи
Гъизгъин гьюжум.
Ригъ алабхъру
Вахт гъабхьнийи,
Саъб гъалайиъ
Архьу кьушмар
Мусурмнарин.
Душмнар душв`ан
Гьергну гъушу
Зубайр кlуру
Гъалайизди.
Думу гъала
Ягъал йишв`ин
Вуйи алиб.
Читин вуйи
Гьюжум апlуб
Ва хьуб гъалиб.
Мусурмнари
Кьялаъ тlапlу
Думу гъала,
Амма бисуз
Адар чара.
Юкьуд йигълан
Фуж-вуш жугьуд
Пайгъамбрихьна
(Салават ва
Салам дугъаз)
Гъюру ва кlур:
«Булагъдин шид
Дина гъюруб
Хътабтlну ккунду».
Дугъу булагъ
Улупуру.
Шид хътlабтlиган,
Мажбур гъахьи
Жугьдар ачухъ
Дяви апlуз.
Магълуб духьну,
Гьергу жугьдар
Шикк гъулазди
Душваъ дапlна
Аьхю барйир,
Душмнар, мютlюгъ
Хьуз даккунди,
Жин духьнайи.
Гъалайин ччвур
Низар вуйи.
Мусурмнари
Му гъалара
Кьялаъ тlапlу,
Швнубна сабан
Гьюжум гъапlу,
Амма душмнар
Мютlюгъ шулдай.
Мусурмнари
Аьмал апlуз
Йикьрар гъапlу:
Гъванар гъивну
Йивру яракь
Ходнаъ ипуз,
Баруйиан
Урч идипуз,
Хабарсузди
Гьюжум апlуз.
Ва жугьдариз
Гучl гъабхьнийи,
Гьергу дурар
Камус кlуру
Гъалайизди.
Мусурмнари
Му гъалара
Кьялаъ тlапlу.
Хъа жугьдариз
Жин хьуз шлу йишв
Имдайи зат.
Ва жугьдарин
Аьхюр Абуль
Хункар хъюгъю
Мясляаьтнан
Йикьрар апlуз:
– Эгер учу,
Ич хизанар
Гъитруш гъягъюз,
Гъабхуз шлубкьан
Мутму хьади,
Шулча мютlюгъ.
Мусурмнарин
Жаваб гъабхьи:
– Гъизилна арс,
Яракь, гьяйвнар
Гъахуз адар
Ич ихтияр.
Амма жугьдар
Кинана бин
Абу-ль-Хукайк
Ва дугъан чве
Улдучlвнийи
Йикьрарилан,
Дурари чпин
Арсна гъизил
Жин гъапlнийи.
Вушра кучlал
Ашкар гъабхьи.
Кучlляхчйирин
Гардан гъиву,
Хъа хизанар
Йисир гъапlу.
