Рягьматлу Зейнуддин халуйин ччвурнахъ аьхю маджлис
Рягьматлу Зейнуддин халуйин ччвурнахъ аьхю маджлис
«Аьлимар пайгъамбрарин ирс-агьлар ву» - гьамци дупна гирами гьядисдиъ. Ав, аьлимарин рякъ Аллагьу Тааьлайинра, халкьдинра улихь лап жавабдарвал айиб ву. Гьаддиз аьлимар му жилилан гъушганра кмиди дурарин ччвурар кIваин апIури гъузра.
ГьепIил гъулан «Гуш» кIуру йишв’ин гьарйисан авгъуст вазли варижямяаьтдин аьхю мажлис кIули гъябгъюри шулу.
Магьа гьаму йисанра 21-пи авгъустди думу «Гуш» кIуру дагъдиин адлу аьлим Зуйнуддин халуйиз бахш вуди аьхю мажлис кIули гъубшну.
Мажлисназ жюрбежюр гъулар-шагьрариан инсанар дуфнайи.
Мажлис ккебгъри, ГьепIил гъулан имам Аьбдулла Аьлиевди вари уч духьнайидариз чухсагъул гъапну, ва му серенжем гирами Каламдиан аятар урхбиинди ачмиш гъапIну.
Улхрудари чпин насигьятнан гафнаъ Зейнудин халуйин уьмрикан, табасарандин аьлимарин жилгъайикан ктибтури гъахьну.
Табасаран халкьдин яшлуйирин Советдин председатель Исамутдин Рамазановди чан улхбаъ мицдар серенжемар тешкил апIбакан халкьдиз айи мянфяаьт зурба вуйиваликан мялумат тувну.
Му мажлисдиъ илим дубгъувалин, илимдиз заан фикир тувувалин хусуси тема ачухъ гъапIнийи. Гьаз гъапиш, ухьуз гьамукьан аьлимари ади гъахьну, хъа гъи ухьу дурарин рякъ ижмиди дибрисиш, халкьдин аьгьвалат лап чIуру гьялнаъ абхъур.
Мажлисдиъ улхури Гурихъ гъулан имам Гьяжи халуйи уч духьнайидарикан аьлимариз гьюрмат апIувал ккун гъапIну. Дугъу чан гафар Пайгъамбарин ﷺ гьядисарихъди аьлава гъапIну ва хусуси вуди жигьил насларикан му ляхниз дикъат фикир тувуб ккун гъапIну.
Мажлисдиъ гьацира Зейнуддин халуйихъди урхури гъахьи Аьбдурашид халу, аьлимдин хтул ва гьацира жарадар удучIвну гъулхну.
Табасаран райондин имам Ансар Рамазановди чан жямяаьтдихьна вуйи илтIикIбаъ гьамци гъапну: «Гьюрматлу уч духьнайи жямяаьт! Аллагьу Тааьлайи ухь’ин жюрбежюр фарзар илирчна: гъудган, ушв бисуб, закят тувуб, гьяж апIуб. Эгер мурарикан сабкьан ухьу апIурдарш мусурманвал тамамди шулдар. Эгер, мисалназ, магазин аш, закят тувну ккунду. Гьяждиз гъягъюз мумкинвал аш, думу тамам дапIну ккунду. Гьарсаб ляхин заан дережайиинди кIулиз адабгъуз чалишмиш духьну ккунду. Му фарзар тамам апIурдарш, Аьхиратдиз гъушган, лап читинди хьибди», - гъапну райондин имамди.
Аьлимарин улхбарин арайиъ «Нашидуль Ислам» группайи чпин уткан сесериинди нашидар-мавлидар гъурхну.
Мажлис варидари сатIиди дюаь апIбиинди ккудубкIну.
