Пайгъамбариз ﷺ ихь ляхнарикан хабар айкIан?
Суал: Ихь Пайгъамбариз ﷺ ухьу апIурайи ляхнарикан хабар туври шулу кIуру гафар гьякьлудар вуйкIан? Эгер гьякьлудар вуш, фуну йигъан хабар туври шуйкIан?
Жаваб: Гьямд ибшри Аллагьу Тааьлайиз, салат ва салам Пайгъамбариина, Дугъан хизандиина ва асгьябариина.
Аль-Баззар кIуру аьлимди Абдуллагьдихьан Пайгъамбарин ﷺ гафар хура: «Йиз уьмур учвуз ниъмат ву, учвхьан узухъди гафар апIуз шулу ва узхьанра учвухъди. Ва гьацира узу му дюн’яйилан гъягъювалра учвуз ниъмат ву, гьаз гъапиш узуз учву апIурайи ляхнарикан хабар тувру: эгер ляхнар ужудар вуш, Аллагьу Тааьлайиз дурарихъан гьямд апIурза, эгер гунагьнандар вуш, Аллагьу Тааьлайикан учвхъан аьфв апIуб ккун апIурза».
Имам Аьгьмадди Аьбдуллагь бин Мас’уддин гафар хура, Пайгъамбари ﷺ гъапну: «Аллагьу Тааьлайин а гьацдар малаикар, дурарин мурад-метлеб гьаму жилиин лицуб ва хъасин инсанарикан шли узуз саламар гъапнуш, гьадрар узухьна рукьуб ву».
إِنَّ للهِ عَزَّ وَجَلَّ مَلَائِكَةً سَيَّاحِينَ فِي الْأَرْضِ يُبَلِّغُونِي مِنْ أُمَّتِي السَّلَامَ
Вари мусурман умматдин ляхнарикан Пайгъамбариз ﷺ «Равзайиъ» ктибтуру. «Равза» Пайгъамбарин ﷺ накьв айи йишваз кIуру, фицики думу чан накьвдиъ чIивиди ву.
Хъа фуну йигъан чан умматарин ляхнарикан Пайгъамбарихьна ﷺ хабар рубкьураш, гьядисариъ дупнадар. Аллагьдиз ﷻ ужуйи аьгъя.
