Жигьил имамарин илимдин рякъ
Хив райондин Сюгют гъулан имам Сабир Гьяжиевдихъди вуйи интервью
Ассаламу аьлейкум, гьюрматлу ватанагьлийир! Магьа нубатнан ражари ихь газатдин машариъ жигьил имамарикан, дурари халкьдин арайиъ гъабхурайи дяватдин ляхнарикан мялумат туврахьа.
Аьхиримжи йисари Хив райондиъ жигьил имамар артухъ шула, гьямд ибшри Аллагьдиз. Гьадму ляхни ухьуз ихь жигьиларин диндин университетариъ урхуз юкlв хъайивал, диндин рякъюъ лихуз аьшкь айивал улупура. Му ляхниан юкlв шад дархьиди гьичра даршул. Ихь жигьилари Пайгъамбарин ﷺ ирс бисура. Хъа фу ву Пайгъамбари ﷺ чаланмина гъибтнайи ирс? Думу илим аьгъю апlувал ва илим тарабгъувал ву.
Хив райондиъ мицдар дигиш’валар шулайивалиин ухьу лап шад вухьа.
Гъийин макьалайиъ Хив райондин Сюгют гъулан имам Гьяжиев Сабир Кабировичдихъди таниш шулухьа ва дугъу Хив райондиъ гъабхурайи ляхникан улхидихьа.
- Сабир Кабирович, сабпи нубатнаан яв уьмрикан ихь газат урхурайидариз бицlиди мялумат тувдихьа.
- Узу 2002-пи йисан Хив райондин Хив гъулаъ бабкан гъахьунзу. Школайиъ урчlвубпи класс ккудубкlбалан кьяляхъ, диндин аьгъювалар гъадагъуз лап аьшкь ади, 2017-пи йисан Огни шагьриъ айи медресейик урхуз кучlвунза. Урхуб ккудубкlбан кьяляхъ, Хив райондин Ккугъ гъулаз имамди гьаъну. Душваъра саб бицlи вахтна гъилихган, хъасин имамди Ляхла гъулаз гьаунзу. Думу гъулаъра йисна гьацlаъ ляхин гъапlунза, хъасин Чювекк гъулаъ кьюд йисан имамвалин вазифйир гъахури гъахьунза. Дидхъанмина магьа гъийин йигъаз Хив райондин Сюгют гъулаъ имамвал апlураза.
- МашаАллагь, жигьилвализ дилигди, магьа юкьубпи гъулаъ имамвалин вазифйир гъахурава. Аллагь кюмек ишривуз. Уву имамвал апlури гъахьи гъуларин агьвалат фици ву? Фунуб гъул артухъдиси кьабул гъабхьунвуз?
- Райондиъ айи гъуларин аьгьвалат имид-амдар варидарин саб ву. Инсанарикан кlуруш, дурарилан узхьан гьичра чlуруб пуз даршул. Гьарсаб гъулаъ чпин активистар шулу, диндихъан юкlв убгурайидар шулу. Гьаддиз гьар гъулан чан хусуси шартIар ади шулу. Му гъулариъ лихруган, узу яваш-явашди жвуваз имамвалин тажруба яркьу апlури гъахьунза. Ав, сабпи ражари имамвал апlуз хъюгъгантlан гьамус гизаф рягьятди ву. Хъа варитlан кьабул гъабхьи гъуларикан кlуруш, му гъуларикан гьарубди йиз квlаъ гьаргандиз шил гъибтна.
- Уву жигьил имам вува. Яв ляхин саб мистан ляхнарихъди аьлакьалу вуйин, дарш жямяаьтдин вари ляхнариъ иштирак шулана?
- Йиз фикриан, имам жямяаьтдин ляхнариъ иштирак духьну ккунду, иллагьки жигьиларихъди аьлакьалу вари ляхнариъ. Гьаддиз узу жигьиларихъди спортзалиъра шулаза, дурарихъди футбол-волейбол апlру йишвариъра шулаза. Мусурман касдин рюгьнан тереф фици сагъиб дубхьну ккундуш, гьаци бедендизра дилигну ккунду. Ихь уьмриъ шулайи вари ляхнари диндихъри теври, ужуб тамам апlури, чlурубдихьан ярхла шули духьну ккун. Сюгют гъуландариз мистазра теклиф апlури шулза. Гьаци дарш, хай шулдар.
- Мист фила тикмиш апlуз хъюгъну ва фила ачмиш гъапlну?
- Му гъулаъ 2017-пи йисан мистан шибритl ипну. Гъуландари ва жюрбежюр йишвариан инсанарин кюмекниинди магьа 2023-пи йисан мист ачмиш гъапlну. Му мистаъ дишлади бицlидариз дарсар тувуз ва имбу диндихъди аьлакьалу серенжемар гъахуз хъюгъюнча. Гъуландар мициб мист абццбиин лап шад ву. Гъит гьарсар касдиз му ляхнин аьхю ужара туври.
Амин Сабир-гьяжи! Гъит Аллагьу Тааьлайи увузра, яв хизандизра аьхю шадвалар, бахтар туври. Учву жигьил баяри вари ляхнар гъитну, диндин ляхин варитlан заанди дибисну лихурайивалиан учу лап шад вуча. Гьаму ляхни ичв терефнаан Пайгъамбарин рякъ варитlан заанди дебккнайивал улупура. Гележег акуб ибшрияв, хъуркьувалар ишривуз, гьюрматлу Сабир Гьяжиев!
