Нач-хIая
Нач-хIая
Суфийтурал хIаялул мисаллу
ХьхьичIвасса салихIинтурал оьрмурдал тарихрава жучIанма бивну бур тамансса гайннал Аллагь Тааьланал хьхьичI нач-хIая душиврул мисаллу. СалихIинтуравасса цаппараннаща хатIа хьусса чIумал Аллагьнаясса ﷻ начлил мизитравун – Аллагьнал ﷻ къатлувун – буххан къашайсса бивкIссар. Ца чIумал халкьуннан ккавккун ур мизитрал кьатIув чак буллалисса инсан. «Чак буван мизитравун циван къауххара?» – цIувххуну бур гайннал. «Ттун Аллагьная нач хъанай дур, цанчирча ттуща бунагь хьунни», – дуллуну дур жаваб.
Мукунсса салихIинтуравух бивкIссар Аллагьная ﷻ бакъа щиячIав нигьа бусан нач хъанахъимигу. Мукунминнавасса цаннал бувсун бур: «Ца хьхьуну ццунсса вацIлувух най бунува жу бувкру шанашисса инсаннал ялун. Ганал чIарав канай бия балчангу. Га чантI учин увну цIуххарду: «ВахIшисса жанавартрал бувцIусса вацIлуву шанан нигьа къаусарав?» – куну. Ганал дахьрасса бакIгу гьаз дурну увкуна: «Ттун начри Аллагь ﷻ акъа цаманая нигьа усан», – куну тамур чулухунай кIура авну шанан ивкIуна». Абубакр ал-Варракьлул f увкуну бур: «На ца-ца чIумал кIира ракааьт чаклилгу дурну му кIанттава лихъара, ци-дунугу дарцусса инсан куна».
Аллагьнал ﷻ Цала лагънахсса хIая
КIулну бикIияра, Аллагь Тааьланан нач шайссар Цала лагъартунная. Тавратраву (Тора) чивчуну буссар: «Бунагьмур бан начну бикIи, мяйжаннугу Ттун хIаяри зун танмихI буван». Цамур илагьийсса луттираву увкуну бур: «Ттул лагъ Ттул чулухунай тIайла акъа ур: Ттухь цанна аьркинмур чIа тIисса чIумал Ттун нач шай ганан къадулун, амма Ттуйн мютIи акъасса чIумал, ганан туяту нач къашай». Идавсил ﷺ хIадисраву тIий бур: «ХIакьну, Аллагь – яла нач Дума ва яла Сахаватмари. Лагънал лергъ тIий кару гьаз дурса чIумал му дуаьлун жаваб къадулун Заннан нач шайссар».
«СалихIминнал тIабиаьт» тIисса луттирава
