Цири бантIисса?
Цири бантIисса?
Ласнал ниттил ттуй мудан аьйрду дувай: дукра нахIуну къадувара, къатри ххуйну къалакьара, хъунама арснал щарссанил гьарзад ххуйну дувай тIий. На мукунсса хавардая шацI хьуну бура. Тамур арснал щар ттуяр 12 шинал хъунмасса бур. Таксса оьрмулувун бивукун ттунгу лахьхьинссар багьу-бизу. Укунсса чIумал цири буван аьркинсса?
Диндалул дурккучунал жаваб:
Исламрал диндалуву ккаккан бувну бур хъамитайпалун цила ласнащал ххуйну бикIан. Мичча наниссар ласнал ниттибуттащалгу ххуйну бикIаву, цанчирча, гай буххайссар ласнал оьрмулуву яла агьамсса инсантуравун. Амма ца-цавай нинухълу оьрчIру хъуни хьуну, кулпатру бувну махъгу гайннай хъиннура гужсса аякьа дуллай, арснал кулпатравун бухлан бикIай. Миннал мурадгу – цила оьрчI ххуйну, рахIатну, гьарзадрал щаллуну ялапар шаву бур. Амма ласнал нину хъиннура мюрш диркIун ялув дацIларча, арснал кулпатраву къалмакъаллу чIяру хъанан дикIай, сайки кулпатру ливсса кIанттурдугума шай. Жалиндалун аьркиншиву дакъассар ласнал ниттил ххуй бизаншиврул хъиннува хIарачат буллай, гамур арснал щарнияр хьхьичIун буккан хIарачат буллай, цуппа ганияр ххуйшиву ккаккан буллан. Ласнащал паракьатну ихтилат бувара, му масала ххал бигьияра, ниттищал гъалгъа бувну ца мукъуйн бучIанмур бувара. БувчIин бувара ганин ина дахьва щар хьусса, уттигу ичIаллил даву магьирну дуван лакъавхьусса душ бушиву, чан-чанну тIий багьу-бизулул сант лахьлантIишиву.
Психологнал жаваб:
Ва ишираву кIива ххуллу буссар. Цалчинмур – ласнал ниттихь бусаву винна ганил аьй-бювкьурду бизар хьушиву. Бюхъайссар мукун учирча га чанну дахчилан. Амма цамур чулуха буругарча, зул дянив хьусса ихтилатрая ганил цила арснахь бусан бюхъайссар. Яла гананни багьантIисса зул дянивсса бувчIу-къубувчIурдалсса буллан. Мунияту, ласнал ниттил чулуха тIааьн бакъасса махъ бавукун гьалак къабуклай, бакъав мишан къадуллай, вийва тахсир бакъашиву ккаккан къабуллай, ганищал рязи хъанарча, хъунма хIал къавхьуну ганил аьй-бювкьурду къуртал хьунтIиссар.
Жавабру дуллуссар диндалул аьлимчу Аьдил Ибрагьимовлул ва психолог АьлиасхIаб Мурзаевлул
