Хала нешла балга (зикру-мавлидла гIергъи бучIуси)
Аллагьу масалли гIяла МухIяммадин ва гIяла али МухIяммадин ва салим
Я архIяма РряхIиман, я архIяма РряхIиман, я Гъафуру РряхIим Аллагь ﷻ! Иманра га, динра га, дин бузахъес ахърира га, иманси хIялра га, хIялалси гIямалра га, дунъя бихIяхъес имканра га, Алжана сархахъес сабурра га, уркIи умули, шайтIан гьарахъли нушачи хъарти дин – тягIят дузахъес ахърира га. Сецадра уркIи гIяярли, чарх гъарацIли, гъапулли барили диахIеллира, нушани балули – хIебалули барибси мавлидра, делчIунти Кьулгьу – АльхIямра, белчIунси зикрура, КьульагIузубира дархьдарили, далдушили, ХIела Расул ХIябиблайчил ﷺ цугдарили, Кьиямала бархIи нушала гьала шиниша халгIятличил, нурла чирагъличил дурасили кадихьагу, Аллагь ﷻ!
Я Аллагь ﷻ, нушаб кирира баахъа, нушаб баибси кири Саййидина Мустафала рухIличи баахъагу Аллагь ﷻ, сунела бегIтала рухIличи, хъалибаргла рухIличи баахъагу Аллагь ﷻ. Адам ХIявачибад (р.гI.) бехIбихьили, ХIела ХIябиб МухIяммадличи ﷺ бикайчи, ихди ургаб акIубти расултала, асхIябтала рухIличи баахъагу, Аллагь ﷻ. Авалра имамла рухIличи баахъагу Аллагь ﷻ, авалра имамли дуцибти тарикьатунала шайхунала рухIличи баахъили, илдала шафагIят, баракат нушачира баахъагу Аллагь ﷻ.
Гьарилра илдала кири цалра нукьсанхIебиубли, нуша даркьибти бегIтала, нушала хъубешунала хIябла бухIнала нурли шалабара, Аллагь ﷻ, чус МяхIшарлизибяхIчили бетаахъа. СиратIла гумиличиб уббихьли бетаахъа, мизан-умцантачиб гIяхIси шайчиб декIсили бетаахъа, Аллагь ﷻ, жагьаннабла цIалис барули бетаахъа, Алжаналис унза ибхьуси бетаахъа, чула хIедарили калунти дехIибайс, хIедуцили калунти дуббуцарлис кафаратли кабизахъа, чула кьаркьайзибад кабикибси вайси секIайс кафаратли кабизахъурли, Аллагь ﷻ, ХIела дурхъати 99 ула хIурмат багьандан кьабулбара, Аллагь ﷻ. 13 ХIела сипатла дурхъадеш багьандан, 124 азир идбагла хIурмат багьандан, 313 расултала хIурмат багьандан. ХIела зубри дицIибти малаикунала хIурмат багьандан, мусни дицIибти асхIябтала хIурмат багьандан, 104 китабла хIурмат багьандан кьабулбарили, бархьбарили, балбарили бегIла гIяхIти гIямалтала бегIти кьукьяла барагу, Аллагь ﷻ.
Я Кьудратла ВегI Аллагь ﷻ, сецад бунагькарти, гIясикарти диахIеллира, ХIела МухIяммадла умматла диъни багьандан, нушала бунагь-хатIаличивад чевверхигу, Аллагь ﷻ!
Шарабла шинван шаладараба, шинна кантIван умудараба, Аллагь ﷻ, галгубала кIариван бунагьуназирад пяхIдарили, умудараба, Аллагь ﷻ. ХIела Расулла тажла дяхIцIилиу даахъабагу, ТIубала галгалиу даахъаба, 73 тарихла бутIала Алжанала кьукьяла дарабагу, Аллагь ﷻ. Иш дунъя булхъухIели, шаласи ахиратлизирад мадулхъахъабагу, Аллагь ﷻ, рухI айсухIели, иман адмайсидгу, Аллагь ﷻ. Иман уркIилизибли, шагьадат лезмиличибли, «Ла илагьа иллаЛлагь» калималичил рухI асагу, Аллагь ﷻ.
ЦIяб хIябла цундешра, бебкIала кьутIкьудешра уркIиличирад мадулхъахъидгу, Аллагь ﷻ. ХIура, ХIела ХIябиб МухIяммадра уркIилизир агарли дуги-хIери армякьяхъидгу, Аллагь ﷻ.
Я Кьудратла ВегI Аллагь ﷻ! ХIуни акIахъубил гьарил дунъяла инсайс уркIи шалали шаладиркахъенгу, шайтIан гьарахъли бархIира ихъахъенгу, Аллагь ﷻ, ХIу гьаниркуси дунъяра га, хIу чеваэси ахиратра га, дила Аллагь ﷻ. Бунагь-балагь агарси, нурли бицIибси хIябра га, шишимъала-анцIкьи агарси дунъяра га, баракат бархси хъалира га, эркинси яшавра га, Алжанализи гьунира га дила Аллагь ﷻ. ХIу дигутачил дунъя гили, ХIед дигутачил ахират гили дархьдарабагу, Аллагь ﷻ.
Я Дурхъаси Аллагь ﷻ! Вайти гIяхIбара, гIяхIти бахъбара, дунъя паргъатбара, халкьла уркIби ряхIятдарагу, Аллагь ﷻ. Дунъяла балагь-хатIализирад, ахирла гIязабтазирадра дерцахъабагу, Аллагь ﷻ.
ХIуни балули нушани хIебалули лябкьуси балагь-кьадарлизирад дерцахъаба, жагьаннабла цIализирад дерцахъаба, СиратIла гумиличир дерцахъаба, Мункар Накирла хIисаб-суаллизирад дерцахъаба, Аллагь ﷻ! Важу бикIуси жагьаннаблизирад дерцахъили, Фирдавс бикIуси Алжанализи хьурадараба, Аллагь ﷻ. Дархьдараба, дяхIчиааба бархьдешличи, хIекьсиличи. Нушани балуси агара, ХIуни хIебалуси агара, нушани барибсиличи ХIела гIягIнидеш агара, хIебарили калунси бацIли кавлуси мер агара. ХIези ахIенси тиладидухъеси мер агара. ХIела гьала хIедакIили дукьеси мер агара, Аллагь ﷻ.
Я Кьудратла ВегI Аллагь ﷻ! Дунъя акIубла акIубти идбаг-расулли дарибти умцухIели, халкьли дарибти гIяхIти декIдарагу, Аллагь ﷻ. МухIяммадла балгаличи, къагъли барибси тIягIятличи ХIу кьабуликили чучи уркIецIи барагу, Аллагь ﷻ. СиратI бицIили, някъби-кьяшми дайдирхъухIели, цабехIти убяхIбуршухIели гьуни гьарзабарагу, Аллагь ﷻ. Дашия или Алжунтази муъминтази вявъибхIели, далли дукабагу, Аллагь ﷻ, вай гIямултала бегIтази амру барибхIели, чузи гьайдиая цIализи ибхIели, далли макабагу, Аллагь ﷻ.
Я Кьудратла ВегI Аллагь! МухIяммад Идбагла ﷺ байрахъла дяхIцIилиу даахъабагу, Аллагь ﷻ, илаб ца кьяшла ганз кацIари мер нушабра тавфикь барагу, Аллагь ﷻ. Кьиямала МяхIшарла дивайчи ХIела гьала дяхI цIябли тIашдизахъес кьадармабирахъидгу, мунафикьунала кьукьялизи гъудурмадираба, Аллагь ﷻ. ХIу дигутала, ХIед дигутала кьукьялизирад дараба. Я Дурхъаси Аллагь ﷻ, «Ла илагьа» – ла гьунчи дяхIчиааба, «илла Ллагь» – ла дякьличи кьадардараба.
Кавсар гIинизла хъалчи амрудараба, зикру, бируси мавлидлизи гъудурдараба, Аллагь ﷻ. Гьидаятла динра гили, динничил гIямрура гили, шагьидла бебкIара гили дархьдарабагу, Аллагь ﷻ.
Аллагьумма салли гIяла МухIяммадин ва гIяла, али МухIяммадин ва салим. Аллагьумма рраббана ати фи дунъя хIясанатан, ва филь ахирати хIясанатан, ва къина гIяза баннар. ФатихIя.
Азгъиндешлизивад мяхIкамируси, Идбагли ﷺ гьаман бучIуси дугIя
Аллагьумма инни агIузубика миналь-хIамми валь-хIазани, валь – гIаджзи валькасали, валь-джубни валь бухли, вадалягIи-д-дайни ва гъалябати-р-риджали.
МягIна: «Я Аллагь ﷻ, ХIуни мяхIкамвараба паргъатагардешлизивад ва пашмандешлизивад, цIакьагардешлизивад ва къайгъиагардешлизивад, кьиркьирдешлизивад ва кабизалаагардешлизивад, чеблала декIдешлизивад ва адамтачи зулму бирнилизивад».
