СягIид-афандила насихIят

Садакьа дигIянали бедлугни гIяхIси саби, цацахIели дакIули беднира гIяхIси саби, вегIличибад цархIилтани гIибрат касахъес багьандан.

БекIлибиубсигъуна – Аллагь ﷻ багьандан бедни саби. Аллагь ﷻ багьандан се-биалра барес ибсила мягIна саби, сенкIун ил ЧевяхIсила хъарбаркь сабхIели, цархIил сегъуналра мурад агарли. Адамла цархIил мурад лебли биалли, ил садакьа ахIен. Имкан лебсилис садакьа бедлугес къиянси ахIен. Ил бихIес саби къиянси.

Илис барсур нуша селичи-биалра хIерли диахIелли, яра ил багьандан уркъбирхъахIелли, садакьа заяли аркьуси саби. ХIушани Аллагь ﷻ багьандан бедая, верхIдаршнали имцIаси шабагъат сархес багьандан.

Садакьализир шел гIяхIдеш лерти сари, хIуша кьиркьирмадирудая: нуни хIушала лебдеш бедахъес ахIен буруси, кьадар баленая.

Амма садакьа бедили гIергъи, халаси бедилра или гьанмабиркахъидая, ил лебдешла вегI Аллагь сай. Илини хIед гибси саби хIела хIялумцIес багьандан,

хIуни ил бархьли харжбиридал ахтардибарес багьандан.

Садакьа беднила цаибил гIяхIдеш – илала вегIла лебдеш гьатIира имцIабирар;

кIиибил – балагьуназивад верцили вирар;

хIябъибил излумас дарман кьяйда сабабли бирар;

авъибил – СиратIла гумиличивад хъярхъли аркьян;

шуибил – Алжанализи хIисаб-суал агарли урхьу.