МархIаба, хирияб моцI
МархIаба, хирияб моцI
МархIаба, я мархIаба,
МархIаба, лъикI щвараб мун,
РахIманасул моцIилан,
ЦIар жинда лъураб Ражаб.
БачIараб батайги мун,
Баракат-рахIмат босун.
БетIергьанасул цIобал,
ЦIергIадин цадахъ росун.
Ражаб моцIрол хиралъи
Лъаларев бусурбанчи,
Ватиларин абуни,
Мекъи ккеларин ккола.
Гьелда жаниб жиб бугеб,
Баракатаб сардилги,
Бицен жинда рагIичIев,
ГIадан ватизе гьечIо.
ГIаламалъул Халикъас,
Хирияв нилъер ХIабиб,
Гьоболлъухъе ахIарав,
МигIражалъул сордойин.
Гьеб сордоялъ Аллагьас,
Амру гьабун тIадкъана,
ТIолабго умматалда,
КIикъоялда анцIго как.
Авараг тIаде хьвадун,
ТIаса рехеян гьарун,
ТIадегIанав Аллагьас,
Ахир щуго как тана.
Щуялдаго жанибги,
Жиндир хIалкIвеялдалъун,
КIикъоялда анцIабго,
Какил хиралъи тана.
Нилъеда Жив гурхIулев,
РахIман БетIергьан вуго.
РачIа адабги гьабун,
Гьесул моцI тIобитIизе.
ТIубараб Ражаб моцIалъ,
КIалал кквезе кIоларес,
КIвараб къадаралъ гьел ккве,
Кири гьезухъ дуй хъвалин.
КIал кквезе гIузру букIун,
Рес рекъоларев чияс,
Черхалъул нафс квегъизе,
Кутакалда яхI бахъе.
Рогьалилгун боголил,
Гьеб кIиябго какгIаги,
ЖамагIат гьабун базе,
Бегьараб жигар бахъе.
Нилъехъаго лъугьарал,
Мунагьазда ракI бухIун,
Радал, къаси гIужалда,
Къойилго тавбу гьабе.
Гьабе дуца садакъа,
СиратIалда батулеб.
Дурго ресалда рекъон,
Дагьабго бугониги.
Бичас разилъулареб,
ЛъикIаб гьечIеб рехун те.
ГIадан пашман гьавулеб,
ГIамал гьабун хьвадуге.
Дурго чорхолъ рессарал
Чорокал тIабигIатал,
ТIаса ине рукIине,
КIвараб хIаракат бахъе.
БетIергьанасул гурхIел,
Даим нилъеда лъеги.
Лъолеб гIамал гьабизе,
Бажари нилъер гIеги.
ГIузраби гIемер ругев,
ГIайибазул цIурав дун,
Диего гьабун тана,
ГьитIинабго гьаб вагIза.
ГIадамаца цIалани,
ЦIикIкIун пайда букIинин,
РакIалде ккана хъвазе,
ХъахIаб кагътида мухъал.
Муъминзаби киналго,
КантIизареги Бичас,
БачIараб хирияб моцI,
Берцинго тIобитIизе.
ТIадегIанав Аллагьас,
ТIолго АхIмадил уммат,
Унти, балагь, къварилъи,
РикIкIад гьарун цIунайги.
