Алжаналъул ва жужахIалъул агьлу

Алжаналъул ва жужахIалъул агьлу

ХIурматиял диналъул вацал ва яцал! Нилъеца гIемер бицуна лъикIаб тIабигIат кквезе ккеялъул хIакъалъулъ. Гьелда сверухъ мажгитазда вагIзабиги мажлисазда насихIаталги дагьал рукIунаро. КигIан гIемер бицунеб бугониги, нилъеца, букIине кколедухъ, гьеб ургьибе биччалеб гьечIеб гIадинги буго.

Къокъго абуни, лъикIаб тIабигIат ккола, дуда аскIов вугев чиясе дудаса щибго лазатбахъи кколареб, мунгун жеги цадахъ вукIине бокьилин гьесда кколеб хIалалда дур тIабигIат лъугьин.

РукIунищха нилъ гьедин? Вихьизецин вокьиларин ккараб хIалалда нилъ ругони, гьеб ккола кIудияб хIинкъи. Щайгурелъул, жинда свалат-салам лъеяв Бичасул аварагас абун буго: «Алжаналъул агьлу буго тамахав, хIеренав ва бигьаяв чи. ЖужахIалъул агьлу буго жиндир агьлуялъе, гьалмагъзабазе ва тухум-кьибилалъе хъачIал», - ян. Балагьеха, бусурбаби, гIамал хъачIаб букIиналдалъунцин жужахI щвезе рес буго. Щайгурелъул гьесул гIамал, зарал цогидаздеги бахунеб букIиналъ.

ХIасил гьабун абуни, лъикIаб ва берцинаб тIабигIат ккола цогидал гIадамал дудехун рукIине бокьулеб къагIидаялда мунгоги цогияздехун вукIин. Гьаб къагIида батIаго гIелмияб хIужа балагьизе кколеб жоги гуро. Дуего цогидаз гьабизе бокьараб куцалда цогияздехун мунго вугони гIолеб буго. Амма нилъер батIияб роцен буго. Умумузул абиги гьечIищ гьелъие нугIлъи гьабулеб. Жиндирго бадиб бугеб чIалу бихьичIого чияр бадиб бугеб сум бихьулилан абураб. Гьеб бугоха нилъерго гIайибал ва хьвади бихьичIого, цогидазулъ бугеб хехго бихьулин абураб. Исламалъ нилъеда малъулеб буго цин нилъго берцин хьвадейин, нилъерго пикру гьабейин абун.

Сайфуллагь-къадияс «Канзул магIариф» абураб тIехьалда хъвалеб буго:

- ТIадегIанав Аллагьас жиндирго лагъзадеридехун гьоркьоблъи гьабула гьев лагъ цогидал гIадамаздехун вукIунеб гIамалалда рекъон. Гьес гIадамаздехун гьабураб гIамалалдалъун гьесиего дандбитIун рекъараб жаза гьабула. Халкъалда гьоркьов Алжан гIадин, рахIматлъун, бакъул багIариялдаса рахIат гьабизе жиндир рагIдукье кIанцIулев чилъун вугесе Аллагьги гьединавлъунго вукIуна. Кинав вугониги лагъасул сайид, ай хважаин валагьун гьев гIабдасе хъулухъ гьабуни, гьеб ккола гьесул саийдасе гьабураблъун, ай гIадамазе гьабулеб кумек, Аллагьасул лагъзалъун гьелги рихьун, гIицIго Аллагьасе гIоло кIодо гьаруни, гьеб ккола живго Аллагь кIодо гьавилъун.

ГIабдуллагь МухIаммадов