«Аятул Курси»

«Аятул Курси»

Къуръаналда руго цо-цо сураби ва аятал жиделъ кIудиял хаслъаби ругел. Гьединазул цояб ккола «Бакъара» сураялъулъ бугеб «аятул Курси». Къуръаналъул бищун машгьураб, бищун хирияб, бищун къиматаб, бищун кири цIикIкIараб аят бугинги абула гьелда. Гьелъул хиралъаби рикIкIине нилъеда хIалги кIоларо.

Гьелъул хиралъиялъул хIакъалъулъ Абу-Умамаца бицун буго, Аварагас ﷺ абунин: «Паризаяб как бан хадуб «аятул Курси» цIаларав чиясе Алжаналде ккезе хвел тун батIияб жоялъ квалквал гьабиларо», - ян (Насаи). Гьеб буго жинца шайтIаналдаса, иблисалдаса, жундуздаса цIунулеблъунги.

Гьеб аятги буго:

اللَّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِندَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ

ТафсирчагIаз гьелъие гьабураб магIнаялдасан буго: «ТIадегIанав Аллагь жив гурев цоги Аллагь гьечIев вуго, жиндие лагълъи гьабизе бегьулев. Жинда релълъараб щибго жоги гьечIев, Жив щибго жоялде хIажатавги гьечIев вуго. Жив чIагояв, Жиндие хвел гьечIев, даимго Жив нахъе хутIулев вуго. Киналниги халкъазул: гIадамал, хIайванал, женал, малаикзаби ва цогидаб кинабго махлукъаталъул тадбир Жинца гьабулев. Гьел киналго Жинде хIажатав, Жив щибго жоялде хIажатав гьечIев вуго. Жинде тIаде загIипаб яги къуватаб макьу бачIун гьелъ Жив кколарев вуго. Гьелъул магIна буго: Гьесде тIаде кинабгIаги гъаплат, кIочен, тохлъи бачIунаро ва Гьев щибаб лахIзаталъ кинабго махлукъаталъул тадбир гьабулев, гьеб махлукъ Жинда бихьулев вуго. Аллагьасул мулк буго зобал-ракьал ва гьезда жаниб бугеб кинабго махлукъат. Кинабго жо Гьесул къудраталда гъоркь буго ва Гьесие лагъзал руго. Щивго чи гьечIо жинца цогидасе шапагIат гьабизе кIолев, Гьес изну кьун хадуб гурони. ГIадамазда жиб лъалеб, бихьулеб дунялияб жо ва гьезда нахъа бугеб, гьезда тIаде бачIине бугеб ахираталъул умуралги Жинда лъалев вуго Аллагь. Жиндир лъай кинабго жоялде гIамлъарав Аллагь. ГIадамазда лъаларо Аллагьасул гIелмабаздаса цIакъ дагьаб жо гурони. Аварагзаби ритIун умматалда лъазабураб къадар гурони. Аллагьасул Курс, зобал-ракьаздаса Жиндир кIодолъи, гIатIилъи цIикIкIараб буго. ТIадегIанав Аллагьасе щибго захIмалъи, гIажизлъи букIунаро гьал киналго зобал-ракьазул тадбир гьабизе ва гьел цIунизе. Аллагь кинабго халкъалда тIад вугев вуго Жиндир ханлъиялдалъун, чIухIиялъул ва кIодолъиялъул БетIергьанги вуго».

МухIаммадгIариф Къурбанов