ДИУ - гIалимзаби хIадур гьарулеб къебелъи
ДИУ - гIалимзаби хIадур гьарулеб къебелъи
Гьал къоязда МахIач-хъалаялда бугеб Дагъистаналъул исламияб университеталда тIобитIана гьанжелъагIан гьенир цIаларал, хIалтIарал ва гьабсагIат цIалулел ругел данде гьарураб гIелмияб мажлис.
МухIаммадгIариф-афандиясул цIаралда бугеб исламияб университеталъе кьучI лъуна 2000-абилеб соналда, ДРялъул муфти, шайих АхIмад-афандиясул хIаракаталдалъун. ГьабсагIат Дагъистаналда ругел гIемерисел имамзаби, диниял церехъаби ккола гьеб университет лъугIарал. Гьединго рехсараб университет лъугIарал хIалтIулел руго тохтурзабилъун, инженераллъун, цогидалги жавабиял ишазда.
Университеталда чIезарун руго киналго шартIалги. Диниял дарсазда цадахъ мутагIилзабазе рес буго гуманитариял гIелмабазулгунги лъай-хъвай гьабизе.
Мажлисалда гIахьаллъи гьабуна ДРялъул муфти АхIмад-афандиясги. Гьес абуна, жинца шукру гьабулин БетIергьанасе, мутагIилзабиги гIалимзабиги цIализаризе гьадинаб рес кьуралъухъ. ГIалимзабазул хиралъиялъул бицунаго гьес ракIалде щвезабуна ЧIикIаса СагIид-афандияс цо гIелмияб мажлисалда абураб. «Гьес абуна жив гIодов чIелин гIалимзаби рихьулеб бакIалда, ай гьезухъ валагьизе вукIинелъун», - ян. Гьединал гIадамал руго гIалимзаби, жидеде балагьиялдалъунцин баракат щолел. Гьел гIалимзаби хIадурулеб къебелъиги гьаб исламияб университет буго. Хъизамалда гьоркьоса дагьав лъай гьечIев гIадав тIаса вищун витIулаан дагьаб цебеги мадрасалде цIализе. Гьанже абуни, лъикIалги ритIулел руго», - ян бицана муфтияс.
