ХIикматазул гъамас
Лукъманул ХIакимил насихIатал
- КIвахIаллъиялдаса ва ццин бахъиналдаса мун цIуне. КIвахIаллъиялъ дур парзал хутIизарула ва ццин бахъиялъ битIараб, ритIухъаб жо къабул гьабиялдаса нахъчIвала.
- ГIемераб мехалъ хIажатханалда гIодор чIани, басуралъул (геморой) унти ккезе рес буго.
- ГIадамалгун ритIухъ вугони, ТIадегIанав Аллагьас I яхI-намус ва цIар цIикIкIинабила.
- Эбел-инсуца тарбия кьун лъималазда кьаби, бекьараб жоялъе ракул мисалалда буго.
- КIалъалелъув къокъ вукIа. ХIажалъи ккедал гьелъул бицуневги вукIунге.
- Дур бугеб къуваталъ гIадамазе квешлъи гьабиялде мун ахIулев вугони, Аллагьасул дудехун бугеб Къуват ракIалде щвезабе. Кида-къадниги квешал гIадамазе Аллагьас I гьабизе бугеб тамихIалдасаги мун цIуне. Аллагьасул тамихI абадияб букIуна.
- Квешаб-лъикIаб дуе лъугьиндал, мун цIуне «гьедин гьабун букIинчIебани лъикI букIинаан» абурал рагIабаздаса.
- Цогидаб риваяталда буго: мун рази гьечIеб дуе лъугьиндал, кидаго рекIелъ «гьелъулъ лъикIлъи буго» абураб жо чIезабе.
- Я, дир вас! КIал кквей шагьват бекиледухъ ва какие зарал кколаредухъ. Как бай кIал кквеялдасаги тIадегIанаб буго. КIал кквей нилъеда тIадкъан буго хасият берцинлъизе ва шагьват бекизе. Жеги кIал кквей рухIанияб рахъ цебетIезелъун буго. Как байин абуни киналниги квешлъабазе ва ахIмакъал мурадазе аслулъун бугеб напс квегъизелъун буго.
- КIалдиса къватIире арал рагIабазда дир ракI чанги гурхIана, амма вуцIцIун чIеялда киданиги ракI гурхIичIо.
- КIалъай гIарац батани, вуцIцIун чIей месед буго.
- Аллагь рехсолареб мажлисазда гIахьаллъи гьабуге. Мун гIалимчи ватаниги гьениб кьолеб лъаялъ дуе пайда гьабуларо, амма жагьилчи ватани, дур жагьлу жеги цIикIкIинабила.
- Я, дир вас! Цогидазул гIакълу дуего хIалтIизабе. Васас гьикъана: «Кин гьеб букIунеб», - илан. Лукъманица абуна: «Дурго масъалабазулъ гIакълу дандбай», - илан.
ГЬУМЕР Х1АДУР ГЬАБУНА ЖАБИР МАЖИДОВАС
