ГIолилазе рухIияб тарбиягун лъай

МахIачхъала шагьаралъул администрациялъул спорталъул, туризмалъул ва гIолилазул ишазул рахъалъ управлениялда тIобитIана гIемерав чи гIахьаллъараб данделъи. Аслияб темаги букIана тIаде гIолеб гIелалъе рухIияб лъайгун тарбия кьеялъул бицараб.

ДРялъул ЖамгIияб палатаялъул член, гIалим Идрис Асадулаевас бицана цIикIкIараз, ай тренераз, педагогаз, жамагIатчагIаз гIолилазде кьолеб кIвар чучлъизе тезе бегьиларин, гьезулгун накъитал гьаризе ккелин. Гьезул рокъосан, къватIисан ругел къварилъаби лъазарун, кумек гьабиялде кIвар кьуни, битIараб букIинаанин абун.

«Гьединго бицине ккела диналъул, тарихалъул. Учительзабигун тренерал ругелъулха, аслияб куцалда, гIолилаз жидедаса мисал босулел чагIи. Гьединлъидал нилъеца хIаракат бахъизе ккола цин нилъерго ва хадуб гIолилазул рухIияб рахъ цебетIезабизе», - ян бицана И. Асадулаевас.