ГурхIел-рахIмуялъулаб тадбир
Дагъистаналдаса велосипедал рачине бокьулел данделъун рукIана гьал къоязда тахшагьаралъул аслияб майданалде.
КIудияб Бергьенлъиялъ 78 сон тIубаялъул хIурматалда гьениб тIобитIана гурхIел-рахIмуялъулаб тадбир. Гьелъул мурадги букIана унтарал лъималазе кумек гьаби.
Тадбир гIуцIун букIана республикаялъул муфтияталъгун цадахъ, «Инсан» фондалъ.
Акциялда гIахьаллъи гьабуна 1500-гIанасев чияс. Гьезда гьоркьор рукIана гIисиналги чIахIиялги. Спонсораз бергьаразе кьуна гIумраялъ ине рес кьолеб путевкаги, гьединго, щуго велосипедги.
Аслияб майданалдасан гьел ана «Анжи-Аренаялде» щвезегIан ва нахъа тана 12 километр.
Гьеб акциялъул хIасилалда бакIарана миллионгIанасеб гъурущ. Кинабго гIарац битIана унтарал лъималазе къваригIараб-тараб босизе.
