Мулоқоти Далер Ҷумъа бо Раиси Ҷумҳурии Тотористон

Дар шаҳри Қазон мулоқоти Вазири энергетика ва захираҳои оби Тоҷикистон Далер Ҷумъа бо Раиси Ҷумҳурии Тотористон Рустам Минниханов доир шуд.

Тибқи иттилои Вазорати энергетика ва захираҳои оби Тоҷикистон, мулоқот дар ҳошияи Форуми байналмилалии электроэнергетикии Қазон – «ЭНЕРГОПРОМ» баргузор гардид.

Далер Ҷумъа ба Рустам Минниханов барои истиқболи самимӣ ва меҳмоннавозӣ изҳори сипос намудааст. Зимнан, сатҳи баланди ташкил ва баргузории Форуми байналмилалии электроэнергетикии Қазон – «ЭНЕРГОПРОМ» махсус таъкид шудааст.

Гуфта шуд, ки имрӯз барои рушди ҳамкории бисёрҷониба байни Ҷумҳурии Тотористон ҳамчун яке аз минтақаҳои пешрафтаи саноатии Федератсияи Русия ва Ҷумҳурии Тоҷикистон имконоти фаровон мавҷуданд.

Ҷонибҳо ба густариши ҳамкорӣ дар бахшҳои электроэнергетика, нафту газ, татбиқи лоиҳаҳои муштарак, ҷалби сармоя, табодули таҷриба ва ҷорӣ намудани технологияҳои муосир таваҷҷуҳ зоҳир намуданд.