Ҷарроҳии нодири лапароскопӣ бори аввал дар Тоҷикистон
Бори аввал дар Тоҷикистон бо истифода аз дастгоҳи муосири “Eye Max” ҷарроҳии гузоштани анастомоз байни рӯда ва маҷрои умумии талхагузари ҷигарӣ бо усули лапароскопӣ, инчунин ревизияи роҳҳои талхагузар анҷом дода шуд.
Ин амалиёти нодири ҷарроҳӣ бо истифода аз технологияҳои муосири тиббӣ дар Муассисаи давлатии “Маркази ҷумҳуриявии илмии ҷарроҳии дилу рагҳо” анҷом дода шудааст.
Ба иттилои масъулини марказ, бемор бо шикоятҳои дарди шадид, дилбеҳузурӣ, қайкунӣ, зардшавии склераи чашм, тағйири ранги пешоб ва заъфи умумӣ ба муассиса муроҷиат намудааст. Дар натиҷаи ташхис тангшавии қисми терминалии роҳҳои талха, васеъшавии кистозии маҷрои умумии талхагузар ва зардшавии механикӣ муайян гардид.
Дар марҳилаи аввал ба бемор бо усули эндоскопӣ стентгузорӣ анҷом дода шуд, ки ба бартараф шудани зардшавии механикӣ мусоидат кард. Баъдан, дар марҳилаи дуюм, амалиёти асосӣ бо усули лапароскопӣ гузаронида шуд.
Директори марказ Ҷамахон Раҳмонов ва мудири шуъбаи ташхису табобат Сорбон Мусоев иброз доштанд, ки бемор бо чунин нишонаҳо ба муассиса муроҷиат кардааст.
Ба гуфтаи онҳо, ташхис тангшавии қисми терминалии роҳҳои талха, васеъшавии кистозии маҷрои умумии талхагузар ва зардшавии механикиро тасдиқ намуд.
“Дар марҳилаи аввал барои бартараф намудани зардшавии механикӣ бо усули эндоскопӣ стентгузории эндобилиарӣ, яъне бе буриш тавассути даҳон ба маҷрои умумии талхагузар анҷом дода шуд”, – изҳор дошт директори марказ.
Ба гуфтаи ӯ, чунин беморон қаблан бо усули анъанавии ҷарроҳӣ, яъне бо буриши 14–16 см ҷарроҳӣ мешуданд, ки ин давраи табобатро тӯлонитар мегардонд.
Гуфта мешавад, табибони марказ барои анҷоми чунин амалиёти муосир дар кишварҳои хориҷӣ курсҳои омӯзишӣ ва бозомӯзӣ гузаштаанд.
