Молдова барои шаҳрвандони Тоҷикистон виза ҷорӣ мекунад
Ҳукумати Молдова тасмим гирифтааст, ки низоми сафарҳои бераводидро барои шаҳрвандони Тоҷикистон ва Қирғизистон бекор намояд. Дар сурати тасдиқи ин иқдом, шаҳрвандони ин ду кишвар барои сафар ба Молдова бояд пешакӣ виза (раводид) гиранд.
Ба иттилои расмии Вазорати корҳои хориҷии Молдова, лоиҳаи қарори дахлдор аллакай таҳия шуда, қарор аст рӯзи 12 ноябри соли 2025 дар ҷаласаи ҳукумат баррасӣ шавад. Агар он аз ҷониби ҳукумат ҷонибдорӣ ёбад, лоиҳа барои тасдиқ ба парлумон ирсол мегардад.
Созишнома дар бораи сафарҳои бераводиди шаҳрвандони кишварҳои узви Иттиҳоди Давлатҳои Мустақил (ИДМ) соли 1993 дар шаҳри Бишкек ба имзо расида буд. Молдова ният дорад иштироки худро дар ин созишнома қатъ намояд.
Мувофиқи маълумоти пешакӣ, бекор шудани низоми бераводид танҳо ба шаҳрвандони Тоҷикистон ва Қирғизистон дахл хоҳад дошт. Шаҳрвандони Русия метавонанд ҳамоно бе виза ба Молдова сафар кунанд.
