Муҳоҷир, эҳтиёт бош!
Мақомоти тафтишотии шаҳри Санкт-Петербурги Русия бар зидди як шаҳрванди 26-солаи Тоҷикистон бо иттиҳоми дар маҳзари ом сафед кардани терроризм парванда кушодаанд. Хадамоти матбуоти Сарраёсати тафтишоти Санкт-Петербург рӯзи 28-уми марти соли 2024 хабар дод, ки ин ҷавони тоҷик дар шарҳҳояш дар Интернет ҳамлаи хунини дар шаҳри Красногорскро сафед кардааст.
Тафсилоти дигар дастрас нест. Дар сабти кӯтоҳе, ки ин ниҳод нашр кард, ҷавони тоҷик мегӯяд, ки “иштибоҳҳоямро ба гардан мегирам ва самимона изҳори пушаймонӣ мекунам”. Бахтовар Ҷумъаев, ҳуқуқшиноси тоҷики муқими Русия пас аз нашри ин видео бо нашри паёме муҳоҷиронро ба эҳтиёт даъват кард: “Мардум, чаро шумо ин қадар соддаед ва дар ҷаҳолат қарор доред? Коммент чӣ ба забони тоҷикӣ менависед, чӣ ба дигар забон, чӣ бо дигар телефону аккаунт, шуморо пайдо мекунанд ва аз ҷавобгарӣ намегурезед. Хусусан дар Русия. Ҳатто забони нимтоҷикии шуморо бо даҳҳо хатоӣ мефаҳманд (мисоли оддӣ дар навор). Бузургони муҳтарам, фарзандон ва ақрабои худро каме лаҷом бикашед!”.
