Тәүбә итү – бәхет ишеге

Аллаһтан гафу үтенүнең фазыйләтләре яхшы билгеле. Хаталарның гафу ителүе – ул җәннәткә керүгә, ризыкның бәрәкәте артуга, көч артуга, зарарларның югалуына, эшләрнең җиңеләюенә яңгыр яуга, байлыкның һәм балаларның артуына китерә. Бу җиңеллек һәм бәхет ишеге. Гафу үтенү белән кайгылар тарала, догалар кабул була, ризык һәм гыйлем ишекләре ачыла.

Истигъфарның үтәлүе (гафу үтенүнең) – тынычлыкка ирешү өчен һәм авырлыкларны җиңеләйтү өчен файдалы ысул.

Ибен Габбас (Аллаһ аңардан разый булсын) әйткән: “Аллаһның Илчесе галәйһиссәләм әйтте: “Әгәр берәү даими Аллаһтан гафу үтенсә, Аллаһ аңа теләсәнинди бәладән дә чыгу юлларын бирә һәм теләсә нинди шомлануда җиңеллек бирә, һәм ул көтмәгән җирдән ризыкландыра”.

Бер сүз белән әйткәндә, Аллаһтан гафу үтенү – ул теләсә нинди проблеманы чишү юлы. Кешеләр еш кына бу хакта оныталар.

Коръән Кәримдә әйтелгән: Дәхи гөнаһларыгыз өчен Аллаһудан гафу сорагыз, соңра тәүбә итеп Аллаһуга кайтыгыз! Шулай булсагыз, Аллаһ сезне дөньяда күркәм файдаландыру илә файдаландырыр, билгеле әҗәлегезгә чаклы, һәм яхшылыкта юмартлык кылганнарга Аллаһ нигъмәтләре белән юмартлык кылыр. (Худ сүрәсе, 3 аять)

Әбү Һөрайра (Аллаһ аңардан разый булсын) әйтте: “Мин Аллаһның Илчесе галәйһиссәләмнең болай дигәнен ишеттем: “Аллаһ белән ант итәм, мин көненә 70 тапкыр Аллаһтан гафу үтенәм һәм Аңа тәүбә кылып мөрәҗәгать итәм”.

Аллаһның күркәм исемнәренең берсе – әл-Гаффәр – Гафу Итүче, Үзенең колларының гөнаһларын даими гафу итә.

Тәүбә ишеге һәрвакыт ачык. Шуңа күрә тәүбәне иртәгә кылырмын дип калдырмагыз, без бит иртәгәсе көн туармы, юкмы икәнен белмибез. Шуңа күрә хәзер тәүбә һәм истигъфар кылыгыз һәм “Әстәгъфиру-Ллаһ” (ягъни Мин Аллаһымнан гафу үтенәм) дип даими әйтегез.

“Дөреслектә Аллаһ тәүбә итүчеләрне һәм пакьләнүчеләрне ярата” (Бакара сүрәсе, 222 аять)

Рөстәм Әминов