Зәй мөхтәсибәтендә Таҗетдин Ялчыгол укулары

Зәй мөхтәсибәтендә Таҗетдин Ялчыгол укулары

Зәй районы мөхтәсибәтендә күренекле татар мәгърифәтчесе, дин эшлеклесе, галим, язучы Таҗетдин Ялчыголның (1768-1838) тормыш юлына һәм иҗатына багышланган “Таҗетдин Ялчыгол мирасы буенча эзләнүләр һәм аларның тарихи әһәмияте” дип исемләнгән XI республикакүләм фәнни-гамәли конференция узды. Әлеге фәнни җыен Татарстан казыйлары, имам-мөхтәсибләр, дин әһелләре, галимнәр, остазлар һәм башка мәртәбәле кунаклар катнашында үтте. Алар арасында – Татарстанның баш казые Җәлил хәзрәт Фазлыев, Татарстан Мөфтиенең мөхтәсибәтләр белән эшләү буенча урынбасары Равил хәзрәт Зөфәров, тел һәм әдәбият белгечләре, татар зыялылары, галимнең нәсел дәвамчылары бар иде. Күркәм чара Зәй районы Имәнлебаш авылы зиратында җирле халык, кайткан кунаклар һәм бер төркем дин әһелләре катнашында атаклы татар мәгърифәтчесенең каберен зиярәт кылудан башланды.

Аннары кунаклар һәм конференциядә катнашучылар Зәй шәһәрендә Таҗетдин Ялчыгол скверына җыелды. Биредә Зәй шәһәренең Таҗетдин Ялчыгол исемендәге Үзәк мәчетенең 30 еллыгы уңаеннан тантана үткәрелде.

Алга таба республикакүләм конференциядә катнашучылар пленар утырышта катнашу өчен Зәй районы Куш-Елга авылына юнәлде, биредә шулай ук Таҗетдин Ялчыголның нәсел дәвамчыларының каберен зиярәт кылу һәм “Хәзрәт чишмәсе” суыннан авыз итү оештырылды. Фәнни җыен Таҗетдин Ялчыголның тормыш юлы, иҗаты, мирасын өйрәнү, саклау һәм аңа карата кызыксыну уяту буенча башкарылган эшләргә нәтиҗә ясап тәмамланды.