Җомга көненең фазыйләтләре

Фәкыйһ Әбү Ләйс Сәмәрканди үзенең иснәде белән Аус бин Аустан риваять итә: “Дөреслектә Аллаһның Илчесе галәйһиссәләм әйтте: “Дөреслектә, сезнең көннәрегезнең артыграгы җомга көнедер. Ул җомга көнендә Адәм галәйһиссәләм бар кылынды һәм җомга көнендә җаны алынды. Янә ул җомга көнендә сурның өрелүе, ягъни Исрафил галәйһиссәләмнең сурга өрүедер. Шулай ук җомга көнендә һәлак булу, ягъни Ахырзаман булып бөтен кешенең үлеп бетүе. Бәс, ул җомга көнендә миңа салаватны күп кылыгыз. Чөнки, дөреслектә, сезнең салаватлар минем хозурыма җибәрелер”. “Әй Аллаһның Илчесе, ничек безнең салаватларыбыз синең хозурыңа җибәрелсен, ягъни үлгәч, ничек синең хозурыңа барсын, тәхкыйк, син черерсең?”, - дип сорадылар. Аллаһның Илчесе галәйһисссәләм әйтте: “Тәхкыйк мин чередем дип әйтерсезме? Дөреслектә, Аллаһ Тәгалә пәйгамбәрләрнең тәннәрен җир хозурына хәрам кылды”.

Янә икенче бер хәбәрдә килә. Дөреслектә, Пәйгамбәребез галәйһиссәләмгә әйттеләр: “Ничек безгә сәлам кайтарылыр, тәхкыйк син черерсең”. Бәс, Аллаһның Илчесе галәйһиссәләм әйтте: “Дөреслектә, Аллаһ Тәгалә пәйгамбәрләрнең тәннәрен черетүне җир өчен хәрам кылды. Минем хозурыма салават әйткән һәрбер бәндәгә сәламне кайтарганга кадәр Аллаһ Тәгалә минем хозурыма җанымны кайтарыр”.

Әбү Ләйс Сәмәркандинең

“Гафилләрне уяту” китабыннан