Мусил ашрапи
Ца кулпатраву ивкIун ур арс. Га жагьил хъанан ивкIукун, буттал увкуну бур:
– Вин кулпат буван чIун хъанай дур. Мунияту вин аьркинссар хъус ляхъин лахьхьин. Насу ца даврийн уххуча, вила захIмат бивхьуну ца мусил ашрапи лявкъуну ттучIан лавсун ухьхьу, яла на вин щарсса дуцинна.
Жагьил му хавардания ххари хьуну, пишгу куну лавгун ур. Ганан дакIнин багьну бур цачIава ниттил буллусса ца ашрапи бушиву. Гьунттимур кьини лавсун га ашрапигу увкIун ур буттачIан.
– Буттай, вана ашрапи! - куну бур арснал.
Буттал ларсун арцу, куртIсса неххавун палцI дурну дур. Арснал къулагъасрагу къадурну цIувххуну бур:
– Тти бучIиссарив ттун щарсса дуцин?
– Ттигу ччяссар, ттул арс! На вихь учавхха, вила каних арцу лякъи, яла на вин хъатIигу буванна, щарссагу дуцинна.
ОьрчI махIаттал хьуну ур буттан цукун бувчIуссар га цала хъяврин увшиву, тIий.
Гьунттимур кьини оьрчI ниттичIан лавгун, ялагу ца ашрапи була увкуну бур. Амма буттал гагу щинавун экьи ливчуну бур. ОьрчI хъиннува махIаттал хьуну ур:
– Буттай, ина циван ура ттул арцу экьи дичлай? Ягу ттун кулпат буванна куну буллусса мукъуя пашман хьурав?!
– Вай ашрапиртту ина вила захIматрайну къалявкъуссар! - увкуну бур буттал.
ОьрчI пикридавун агьну ур. Вания тихунайгу танмал хъанарча, буттал цанна дурагу щарсса къадуцинссархха тIий, ашрапи лякъиннин зунна тIисса хIукмулийн увкIун ур.
Лавгун бур тамансса замана. Ашрапи лякъиншиврул жагьилнан мадара захIмат бишин багьну бур. Цаятува цува рязину увкIун буттачIан, ккаккан бувну бур ашрапи. Буттал га хъап бувну, гава куццуй неххавун бутан галай бувну бур. Микку арс тIанкI дурну ххявххун, буттал ка дургьуну дур, арцу экьи къадутаншиврул:
– Буттай, мудував му къел. Вин къакIуллив ва ашрапи лякъин на хьхьу-кьини дакъа цими гьантлий зий ивкIссарав?! Ина ттул захIмат палцI бувну щинавун бутан ччай урав?! – куну бур.
– Ттул арс, тти чIунссар вин кулпат буван, - увкуну бур буттал. – Вин дахьва кIул хьунни захIматрал ва хъуслил кьимат. Вила каних ляркъумур ина аькьлу буну харж дуллантIиссара.
Мунияр махъ хъатIигу бувну дурцуну дур оьрчIан щарсса.
