Алжаннавун буххан буваймур
Инсаннансса яла хъунмур талихI – Аллагьнал ﷻ рязишиврийн ияву. Мукунманансса бахшишругу – абадлийсса неъматрайн Алжаннавун уххавур. МухIаммад Идавсил ﷺ тамансса хIадисирттаву бувсун бур Алжаннул неъматру лайкь хьуншиврул дуван аьркинсса давурттая. Ва макьалалуву гайнувасса цаппара чичинну.
Аллагьнайн ﷻ ва Заннал Илчинайн ﷺ вих шаву (иман дишаву)
ХIадисраву увкуну бур: «Аллагьнайн ﷻ ва Идавсийн ﷺ вихну, ххювагу фаризасса чак буллай, Рамазан зуруй зума дугьлай ивкIма Алжаннавун уххантIиссар (аль-Бухари).
Аллагьная ﷻ, Идавсия ﷺ ва диндалия рязишиву
ХIадисраву тIий бур: «"Рази́ту би-Лля́гьи Раббан, ва би-ль-Исля́ми ди́нан ва би-МухIаммадин салляллаhу ‘аляйhи ва саллям набийян" учайма Алжаннавун уххантIиссар.
Мяъна: «На рязиссара Аллагь – ттул Зал ушиврия, Ислам ттул дин душиврия, МухIаммад ﷺ – жучIан гьан увсса Идавс ушиврия» (АхIмад, ан-Насаи, аль-Байгьакьи).
Лайкьсса куццуй ХIаж щаллу баву
Идавсил ﷺ увкуну бур: «Аллагьнал ﷻ кьамул бувсса ХIажлил чири – так Алжанни» (АхIмад).
Хъинсса хасият
Идавсихь ﷻ цIувххуну бивкIссар, инсан Алжаннавун уххан яла кумаг баймур тIул цумурди, куну. «Аллагьная ﷻ нигьа бусаву ва ххуйсса хасият душиву», – увкуссар Идавсил ﷺ.
СситтучIа ссавур даву
Абу-Дардал миннат бувну бивкIссар МухIаммад Идавсихь ﷺ цува Алжаннавун уххан увансса аьмал буси куну. Идавсилгу ﷺ увкуссар: «Сси мабизларда, ина Алжаннавун уххантIиссара» (ат-ТIабарани).
Маччачу ивчIайхту ссавур даву
Идавсил ﷺ увкуну бур: «Аллагь Тааьла тIий ур: "Цана ххирасса инсан дунияллия лавгукун, Ттуясса чирилийн умуд бивхьуну ссавур дурманан цамур чири – так Алжанни» (аль-Бухари).
Ятинтурай аякьа даву
МухIаммад Идавсил ﷺ увкуссар: «Ятиннай аякьа дувайма Алжаннаву ттучIан гъанну икIантIиссар вай кIива кIисса кунма». Укунгу куну, идавсил цала канийсса кIива кIиссурайн ишара дурссар (аль-Бухари, Муслим).
Мизит баву
«Ва дунияллий Аллагьнахлуну ﷻ (дакIмарцIну) мизит бувсса инсаннан Аллагьнал ﷻ Алжаннаву къала (къатри) хIадур бувантIиссар», – увкуну бур хIадисраву (аль-Бухари, Муслим).
Маз ва чурх буруччаву
ХIадисраву тIий бур: «Цала мазрал ва аьвратрал бунагьирттая уруччин махъ буллума Алжаннавун уххантIишиву на махъ буллай ура» (аль-Бухари).
Алжан чIа учаву
Кьинилун шамилла ва дуаь дуккайманан Алжан буссар куну бур хIадисраву: ««Алл́агьумма инни́ асъалюкаль-джанната ва аоьҙу бика мина-н-на́р!»
Мяъна: «Я Аллагь, на вихь чIа тIий ура Алжаннавун уххан аву ва цIарая (Дужжагьрая) уруччаву» (ат-Тирмизи).
Элмулул ххуллийн уккаву
«Элму ласун (лахьхьин) ххуллийн увкманан Аллагьнал бигьа бантIиссар Алжаннавунсса ххуллу» (Муслим).
Душру хъуни баву
Аьбдуллагьлул арснал Жабирдул бувсун бур Идавсил ﷺ укунсса махъру увкушиву: «Шанма душ лайкьну, цIими бивхьуну хъуни бувсса адиминан Алжан буссар». Ца инсаннал цIувххуну бур: «КIива душ бухьурча?» «КIива бухьурчагу (Алжан буссар)!» увкуну бур Идавсил ﷺ. (АхIмад, аль-Бухари).
Чакру мизитраву баву
Абу Гьурайрал бувсун бур укунсса хIадис: «КIюрххил ва гьанттайн чIумал мизитравун ачайманан Алжаннаву хъамалушин (лайкьсса кIану) хIадур байссар» (аль-Бухари, Муслим).
«Аятуль-Курси» буккаву
ХIадисраву увкуну бур: «Гьарца чаклил хъирив «Аятуль-Курси» буккайманал ва Алжаннул дянив так бивкIу буссар» (Насаи). Ванил мяънагу: инсан Алжаннавун къауххаврил багьана – уттигу дунияллий уттавану ушивур.
Азан (акбар) учаву
Ибн Оьмардул бувсун бур Идавсил ﷺ увкумур: «АцIния кIира шинал мутталий акбар (азан) тIий ивкIсса инсан чара бакъа Алжаннавун уххантIиссар. Гьарца азандалух мунан ряхцIалва хъинбалалул чири буссар, гьарца кьаматрах – зувива хъинбалалул чири буссар» (Ибн Маджагь).
