Мюрщулт марцIшиврий вардиш цукун бувантIиссар?
Мюрщулт марцIшиврий вардиш цукун бувантIиссар?
Мудан ччанналу леголул деталлу, микку-тиккун бивчусса кканпитIирттал чагъарду… Мюрщисса оьрчIру ва марцIшиву ца кIанттаву дикIан къабюхъайсса ххай бурув? На зун лахьхьин буванна оьрчIру марцIшиврий аьдат бувайса куц.
• Зунгу хIисав хьухьунссар шанна шинавусса оьрчIру ниттихъан кумаг буллан хIарачат буллай бикIайшиву. Му чIумал яла агьаммур – миннацIун бавкьуну, махъунмай байщун къабавур. Тапшур дувара миннайн бигьасса даву: ххит лишин, цIинцI бадралувун экьи дичин, къатлувусса тIутIуйн щин дутIин. ЧIивисса оьрмулия шинмай «кьадити, нара дуваннача» тIисса махъ баллалисса оьрчIру чансса хъуни хьуну аькьлу букIлан бивкIукун, ми аьдат хьунтIиссар гьарзад ниттил цила дувайссар, ганин кумаг къааьркинссар тIисса пикрилийн.
• Къатлуву марцIшиву дуруччаврил хьхьичIунмур кьяйда – гьарца задрал цила кIану бикIавур. Цукунни му иш чIивитIун бувчIин бувантIисса. Ганал игрушка ладиркIун дур дивандалул лув, конструктор дякъатлуву, ссихьри – столданул лув. Му махIаттал хъанай уссар, циванни ваксса ххуйну дирхьусса игрушккартту дукьан аьркинсса, циванни дада дяъвайсса, тIий. Му чIумал нитти-буттал фантазия зузи дуван аьркинссар. ОьрчIащал архIал хъун бакъасса къуршилия игрушккардансса къатта хIадур буван бучIиссар, гьанттайннай гай циняр дигьа лаган гиву утту дишин дуван аьркинссар, куну. Гьарца кьини оьрчIан дакIнин булутияра инсан шанан утту ишайсса куна, игрушккардугу цила къатлуву утту дишин дуван аьркиншиву. Му куццуй, чан-чанну тIий оьрчI низамрайн вардиш хьунтIиссар.
• Бутта кьатIату шавай увххукун кьяпа ца чулинмай палцI буллай, жуларду гамур чулиннай дичлай, нинугу щала кьини дукра дуркусса тахIни раковиналувун цачIун дуллай, кIюрххил бивзукун цила хъирив шану бакъатIлай бухьурча, миннал оьрчIру марцIшиврух, низамрах гъира бусса къахьунтIиссар. ОьрчIру – жула дагьанттур. Гайннал жува увкумур къаласунтIиссар, так жура дуллалимурди дуллантIисса. МарцIшиврухсса гъирагу гайннан жула мисалданийну ккаккан буллан аьркинссар. Мунияту зула мазрая букьан бувара «цIана чIун дакъар, яла дуванна» тIисса махъру, акъахьурча, зул оьрчалгу мукуннасса хасият хьунтIиссар.
САЛИМАТ МАХIАММАДОВА
