Шанугу - неъмат
Шанашаву – Аллагьу Тааьланал жунма буллусса хъунмасса неъмат хъанай бур. Шанашисса чIумал инсаннал чурх ва къюкI дигьа лаглай дур, инсан игьалаглай ур. Гьарца затираву кунна, шанан утту ишавривугу дуссар цилла адабру:
1) ХъатIан чак бувну махъ аьркин бакъасса гъалгъарду къабуллай, телевизорданух къауруглай утту ишаву хъинссар. Хъамаличувнащал гъалгъа бан, Кьуръан буккин, элму лахьхьин бучIиссар. Жула Идавсгу ﷺ хъатIан чак байхтту лахъи къалавгун утту ишайсса ивкIссар.
2) Утту ишиннин чаклин ивссуну хъинссар.
3) УрчIамур чулий, Кьиблалин лажинну утту ишаву суннатссар.
4) Дуаь дайсса чIумал кунна кару дургьуну, «Ан-Нас» ва «Аль-Фалакь» сурарду бувккуну, кару чурххайх дурккун хъинссар.
5) 33-ва «СубхIаналлагь», 33-ва «АльхIамдулиллагь», 34-ва «Аллагьу акбар» увкуну хъинссар.
6) Га ларгсса кьини инава цукун гьан дурну дурив пикри бувну, ххуйну ларгун духьурча, Аллагьнайн щукру бувну, оьккину ларгун духьурча, тавба дурну хъинссар.
7) Лякьлуй утту ивхьуну шанан къахъинссар, муния чурххан зарал буссар, ссихI бигьингу захIмат шайссар.
8) Шану биллай бакъахьурча, Кьуръандалул сурарду бувккуну хъинссар.
9) Ххуйсса макI ккаккарча, Аллагьнайн ﷻ щукру байссар. Му макI инава ххирасса инсаннахь бусан бучIиссар. Оьсса макI ккаккарчарив, щихьчIав къабусайссар.
10) ЧантI увкукун ва дуаь дуккайссар: «АльхIамдулиллагьи ллази ахIйана бяъда ма аматана ва илайгьи-н-нушур».
11) Шанан утту ишайсса чIумал нийят дикIан аьркинссар хьхьувай ивзун эбадат дансса.
