Барча хьуннав байран!

Дагъусттаннал Муфтий щейх АхIмад-афандинал барча бавуртту

Ассаламу аьлайкум ва рахIматуллагьи ва баракатугь, ххирасса уссурвал ва ссурвал!

ДакIнихтуну зу циняв барча буллай ура циняв бусурманнал агьаммур шадлугъ – Кьурбан-байран дучIаврищал!

Ва байран хъанахъиссар ХIаж щаллу баврил лишан. Ванил хъанахъиссар Аллагьнайн ﷻ эбадатраву ляличIисса хIарачат бан, Заннайн хъиннува щукру бан буллусса мажал. Хъуннасса къулагъас дуван аьркинссар вай мубараксса гьантрай миски-гъаривнай, мюхтажминнай аякьа даврих ва гайннал дакIру ххари даврих.

Аллагьу Тааьланал жуйнна оьвчаву дурну, увкуну бур (мяъна): «Зуяту Аллагь рязи къахьунтIиссар, хъинбалардал ххуллий зунна ххирасса хъус харж къадулларча. Циксса харж дуварчагу, Заннан кIулссар» («Али Эмран» суралул 92-мур аят). Муниятур жулва чIаравминнай аякьа даву хъинну агьамсса.

Жулва билаятрая азарахъул инсантал лавгунни мубараксса Макка-Мадиналул аьрщарайн, диндалул ца агьамсса тIалавшинна биттур дуван. Му неъматрахгу дазу-зума дакъасса щукру Аллагьнайн ﷻ. Заннал кьамул баннав хIажитурал дурсса эбадатру, гьарцаманал бувсса Кьурбанну ва дуаьрду.

Кьурбандалул кьинирдай щалва дунияллий шайссар миски-гъаривнан, мушакъатминнан, ятинтуран ка-кумаграл акциярду. Гьарца бувсса хъинбалалух Аллагьу Тааьланал чири булуннав, хъиннува дакI цIий, халкьуннан мюнпатсса давуртту дуллансса каши-кьудрат дулуннав!

ЧIа тIий ура Заннахь дунияллий дакьаву шаву, жулва жямат бала-апатIирттая буруччаву. Аллагьнал ﷻ жула бунагьру багъишла битаннав, талихI булуннав, барачат бишаннав!

2026-05-01 (Зуль-Кьаъда 1447 ш.) №5.

Аьрай, ярагъ бакъассагу, аьркинни дакIнил кьянкьашивугу, гуманитар кумаграцIун рувхIаниймур кумаггу. Ва кIанттул агьамшиву чIалай, жулва аьралийтурал чIарав бацIан, дакIниймур ласун 2024-ку шиная шинмай диндалул къуллугъчиталгу заназиссар СВО-райн. Мукунминнавасса ца ур 5-мур армиялул...

Апрель зурул байбихьулий Дагъусттаннай гужсса гъараллу лачIлай, марххалтту буллай, хъунисса зараллу хьунни инсантурал къатта-къушлин, хъу-лухччилун, ризкьилун, ххуллурдан. Инттухунмай бувсса кIусса марххалттанул Хъусращиял ва Ккуллал шяраваллан хъунисса зараллу биян бунни, гъараллая хъунмасса зарал...

Цаннал цаннан укра зад дулаву, ссайгъат баву ссуннатссар, Аллагьнал ﷻ ххуллий, Аллагь ﷻ рязи уван дуллай ухьурча. Му дулайнигу «на ва хъус вин укра дулав», – куну дулайманал учин аьркинссар. «Нагу кьамул дурссар», - куну, ласайманалгу учин аьркинссар. Мукун къакуну,...

КIулну бикIияра, Аллагьнал ﷻ хьхьичI бакъассар тавакулдануяр лахъсса даража. Аллагьнайн ﷻ таваккул бувтун, Заннал бувсса хIукмурдайн мютIину, цала циняв ишру Аллагьнайн ﷻ тапшур бувну, кьадардания рязину умари цала дин цIакь дурма. Таваккулданий аьй дувайманал диндалий аьй дуллалиссар. Таваккул...

Оьмар-асхIаб халифну усса чIумал муначIан ца жугьутI увкIун ур. Идавсил ﷺ мизитравунгу увххун, Абу Аюб аль-Ансаринал чIарав щяивкIсса Оьмар-асхIабнахгу урувгун ганал цIувххуну бур: «Инарав инсантурахь цIуххаву дувайма, амма вихьва щилчIав къацIуххайма, муъминтурал хъунама, амма вил хъунама...

Барча хьуннав байран!