«Зу талихI бусса инсанталлу!»

«Зу талихI бусса инсанталлу!»

«ДакI тIиртIуну учин хьунссар зу талихI бусса инсанталлу!» – вай мукъурттия байбивхьуна Дагъусттаннал Муфтий шайх АхIмад-афандинал цала ихтилат апрельданул 23-нний хьусса «Ас-салам» кказитрал редакциялул зузалтращалсса хьунабакьаврий.

Шикку гьуртту хьуна Муфтийнал хъиривчу Аьбдуллагь Аджимоллаев ва 13 мазрай буклакисса кказитрал редактортал, корреспондентътал ва кказит чичавриха ва биян бавриха зузими. «Ас-саламрал» хъунмур редактор Наира МахIмудовал бувсуна хIакьинусса кьини кказитрал аьмсса тираж 170 азаруннийн бивсса бушиву. Ванил кIицI лавгуна чагъарданул кказит бакъасса, электронный журалийссагу бушиву, социал сетирдаву даву дачин дурну душиву, щала Аьрасатнавусса буккултращал дахIаву дугьаврих хъуннасса къулагъас дуллалишиву ва телефондалунсса приложение ита даркьушиву.

Муфтийнал барчаллагь увкуна редакциялул зузалтрахь ва маслихIат бувуна зула давриву вихшалдарайн ва хIурматрайн чул бивщуну бикIи куну. Шайхнал кIицI лавгуна укунсса журалул кказитрайхчIин буккултрал тIул-тIабиаьт ва хасият ххуй чулиннай кIура даян дуллан аьркиншиву. Мажлисрал ахирданий кказитрал зузалтран Муфтийнал чулухасса барчаллагьрал чагъарду ва бахшишру дуллуна.

2026-03-01 (Рамазан 1447 ш.) №3.


Байран барча хьуннав!

Ассаламу аьлайкум ва рахIматуллагьи ва баракатугьу! Ххирасса уссурвал ва ссурвал! ДакIнийхтуну барча тIий ура жула ялун нанисса мубараксса Зумаритавал кьини – зумалул, дуаьрдал, эбадатрал, марцIсса тавбалул ва рувхIанийсса дахханашивурттал вибувцIусса Рамазан зурул ахир дуллалисса...


СсахI бичаву

Хъус марцI дуван хъуслий закат ялув бувсса кунма, чурх марцI буван, зумалувусса диялдакъашивуртту кIучI дуван, зума АллагьначIа ﷻ кьамулну лякъин, зумаритавал ссахIгу ялув бувссар. Инсаннал дургьусса зума лухччи-ссавнил дянив дарцIуну дикIайссар, ссахI букканнин ссавруннайн...


Аллагьнайн ﷻ таваккул бутаву

Таваккулданул мяъна КIулну бикIияра, таваккул – му паракьатшиву дакъасса гьалакшивур ва гьалакшиву дакъанурасса паракьатшивур. Мунил мяънагу – ина буллугъшиврухгу, мискиншиврухгу ца куццуй уругавур. Щаллуну Аллагьнайн ﷻ вихшала диша, вила оьрму Заннайн тапшур бува щак къаувкуну, му...


“Хайр бакъасса инсантал...”

Инсаннал дакIнил азардавасса ца азар – дакIхъуншивури. Му чIалан дикIайссар, инсантурал тIимур сан къабаврийну. ДакIхъуншиврул дайдихьу – цува цайминнаяр лахъну чIалачIаву. Му иширайн Идавсил ﷺ увкуссар: «КъауххантIиссар Алжаннавун чанссарагу дакI хъун дувайма». Му...


Аьдатрайсса Исламрал ххуллур цанмагу, чингу мюнпатмур

Цалчинмур ЦIувкIратусса ХIажикьурбаннул ва Лайлил душ Эльмира (Ххадижат) Нуруттинова республикалий машгьурну бур Исламрал журналист ва динийсса жяматийсса ишккакку хIисаврай. Исламрал хъаннил мероприятияртту дачин дувангу чIярумур чIумал ванийн вихшала дувай. Дагъусттаннал Муфтиятрал просвещениялул...