«Ас-Салам» кказитрал мажлис

Вай гьантрай ЦIуссалакрал райондалий хьунни дуклаки оьрчIал дянив баян бувну бивкIсса «Ас-салам» кказитран хас бувсса суаллаясса конкурсрал хIасиллу дуллалисса мажлис. Баян бувсса конкурсрал хIасиллу дуллай байбишиннин, ихтилатру бувунни диндалул аьлимтурал, имамтурал, администрациялул ва цаймигу хIукуматрал идарарттал зузалтрал.

Бачин бувну ия мажлис «Инсан» фондрал вакил Камил Щайхов. Мероприятие дайдихьлай, муфтиятрал вакилтурал бувсунни кказитрал тарихрая, ихIсандалул давуртту дуллалисса «Инсан» фондраяту, бувккунни Кьуръандалул аятру.

Конкурсрал агьаммур мурад хъанай бия рувхIанийсса насихIатру булаву ва диндалул кIулшивуртту лахьхьаврихсса гъира бутаву.

Ва агьамшиву дусса даврил сакиншинначитал хьунни ДР-лул Муфтият, ЦIуссалакрал райондалийсса муфтиятрал просвещениялул отдел.

ЦIуссалакрал райондалул имамтурал советрал председатель Шамил Назировлул бувсунни райондалий «Ас-Салам» кказит хъинну тIалавну бушиву ва цачIава кказитрал подписчиктал чIявусса бушиву. Ванал мукунма кIицI лавгунни райондалий дуллалисса диндалул цинярдагу мероприятирдаву чIарав бацIайшиву ЦIуссалакрал райондалул администрация.

Ихтилатру бувунни мукунма Ухссавнил территориялул округрайсса Дагъусттаннал муфтиятрал вакил Израил МухIаммадбасировлул, ЦIуссалакрал райондалул администрациялул бакIчинал хъиривчу Гъаирбаг Мусаевлул, ЦIуссалакрал школалул директор Руслан МахIаммадовлул, Хасавюртуллал имамтурал советрал председательнал хъиривчу Аьли Султановлул, цинярдагу райондалийсса диндалул мероприятиярдал кабакьу бувайсса Аьбдурашид МутIаевлул.

Ихтилатирттая махъ байбивхьунни конкурсраву ххув хьуминнан бахшишру дуллай. Мунияр махъ райондалийсса «Ас-саламрал» чичултрал дянив кIунтти бувккун дарчIунни кьиматсса бахшишру.

Ахирданий, райондалий дуллалисса диндалул мероприятиялувух чялишсса гьурттушинна дуллалисса инсантуран буллунни барчаллагьрал чагъарду. Ми лайкь бувминнавух бия ЦIуссалакрал райондалул бакIчи МахIаммад-ХIажи Айдиев, ЦIуссалакрал кIулшивуртту дулаврил управлениялул хъунмур Светлана Къудаева, райондалул азарханалул хъунмур Нажибат Султанова, райондалул депутатътал, школалул директортал ва учительтал.

Имара Саидова