Гъумук диндалул мажлис

Гъумук диндалул мажлис

Октябьданул 12-нний Гъази-Гъумук хьунни райондалул даражалийсса диндалул мажлис. Ва бия хас бувну МухIаммад Идавсил ﷺ оьрмулул тарихран. Лакрал райондалул маданиятрал къатравун тамансса агьали цачIун хьуну бия. БувкIуна райондалул шяраваллал имамтал, хIукуматрал ва цайми идарарттал вакилтал.

Мажлис тIивтIуна миллатирттал дянивсса конкурсраву ххув хьусса хIафиз (щалва Кьуръан дакIних кIулма) Аьлимирза ХIажимусаевлул Кьуръан буккаврийну. Исвагьисса чIуний ккалаккисса аятирттах вичIи дирхьуну махъ мажлис бачин бувуна Лакрал райондалул имам МухIаммад Майрановлул. Ванал кIицI лавгуна Аллагьнал ﷻ хьхьичI яла лайкьма – цала кулпатращал хъинма ушиву. Бувсуна оьрчIру багьайсса куццуй тарбия баврил агьамшиву ва муниву хъунмур бияла арамтуннай бивхьуну бушиву.

Цалчин вяъза-насихIат бусан увккуна ЦIуминалийсса (Новострой) ДучIиннал имам Мурад ХIусайнов. Ванал бувсуна Исламрал диндалуву уссушиврун дуллусса агьамшивруя. «Кьуръандалул ца аятраву увкуну бур (мяъна): "Циняв муъминтал, дакIниву иман дусса инсантал – уссурвалли". МухIаммад Идавсилгу ﷺ увкуссар: "Зул иман камил къахьунтIиссар зу куннан ку ххира къахьурча". Бувсун бур хIакьсса бусурманчунал цала диндалул уссин зарал къабувайшиву, захIматшиврувун агьсса чIумал кьакъаитайшиву, кумаг аьркинсса кIанттай чIарав ацIайшиву, къашавайманах урган лагайшиву, хъуниминнал хIурмат байшиву, гъан-маччаминнащал дахIаву дуруччайшиву, мюрщиминнай цIими байшиву».

Хъирив махъ лавхъуна Ккуллал райондалул имам МухIаммадманнар Бариевлул. Имамнал дакIнин бувтуна ватандалул тарих хъама битан къабучIишиву: «Аьлимтурал увкуну бур: "Ватан ххирашиву – имандалуятур". Жула дин дуруччирча, ватангу ххира шайссар, ватандалун хайр биянмур буллансса гъира бикIайссар. Тарихравун буругарча, жула буттал буттахъал цалчин дингу кьамул дурну, цайми миллатирттал дянивгу машгьур дуллай бивкIссар. Вана му иш тIайлашиву исват буллалисса далилгу – шикку Гъумуксса Хъун мизит, 1270 шинал хьхьичI бувсса. Гукунсса буттахъал наслу жува бухьувкун, гайннан лайкьну къуццу буллан аьркинссару. АбутIалиб Гъапуровлул увкусса куццуй, жула тарихравун ттупанча битан къабучIиссар, акъахьурча бучIантIимунил жуйнма ттуп битантIиссар».

Яла насихIат бусан увккуна Гъази-Гъумучиял имам Ансар Сулайманов. Ванал бувсуна ца хъинсса мажлисрал лиххан байшиву азарвахъул оьккисса мажлисирттай бувсса бунагьру. ДакIнин бувтуна МухIаммад Идавс ﷺ Аллагьу Тааьланал гьан увшиву аьлам-халкьуннан рахIмулун.

Хъирив махъ буллуна Лакрал райондалул бакIчи Юсуп МахIаммадовлухьхьун. Ванал циняв клубравун бавтIми МухIаммад Идавс ﷺ хъун уллалисса мажлисращал барча бувуна. НасихIат буллай ия оьрчIру мизитирттавун занази бувара, дин лахьхьин битияра куну.

Райондалул бакIчинал каруннава бахшишру ларсуна джиу-джитсулул Европанал чемпионатрай хьхьичIунсса кIантту бувхьусса имамтурал: Гъумучиял имамнал хъиривчу Баталов ХIабиблул (3-мур кIану), ШавкIуллал имам ОьмархIажиев Насрудиннул (2-мур кIану) ва Кумиял имам Кебедов Оьмардул (1-мур кIану).

Махъру лахъаврил лях мавлудру ккалай бия группарду «Кази-Кумух» ва «Савтул-Ислам». Мукунма, кIунтти бувккун ва диндалиясса суаллу буллуну залдануву щябивкIминнан пишкаш дуруна жура-журасса бахшишру.

Мажлисрал ахирданий мажлисрайн бавтIсса циняв душваран ва хъаннин пишкаш дуруна хъункIул тIутIив.

И. Оьмаров