«Дакьаву жула къатравун»

«Дакьаву жула къатравун»

Сентябрьданул 12-нний МахIачкъалалул Хъун майданнив хьунни «Дакьаву жула къатравун» тIисса цIанилусса, МухIаммад Идавс ﷺ дунияллийн увксса Рабиоьл-аввал зурун хас бувсса мажлис.

Шиккун цачIун хьуну бия щалва Дагъусттанная ва цайми регионная бувкIсса 20000-ннийн бивсса агьали. Дайдихьу дурунни Хъун мизитрал муаззин МухIаммад-Аьриф МухIаммадовлул мубараксса Кьуръандалул аятру буккаврия.

Дагъусттаннал Муфтий щейх АхIмад-афандинал кIицI лавгунни жула хIукумат дуруччаврил ва мурахасшиврул агьамшиву. Барчаллагь увкунни низам дуруччаврил органнал зузалтрахь, хаснува июнь зуруй хьусса терактрайн данди бавцIуминнахь. Га кьини ливтIусса органнал зузалтрал мачча-гъаннан Муфтийнал пишкаш дурунни Оьмра (чIивимур ХIаж) бувансса путёвкартту.

Хъирив махъ лавхъунни Иорданнал хIукуматрал Муфтий шейх АхIмад аль-ХIасанатлул. Аьлимчунал чIурчIав дурунни ттуршрахъул шиннардил мутталий Исламрал тарбиялийну сакин хьусса, жула буттахъая ирсирай дирсса диндалул ва маданиятрал агьамшиву дуруччин аьркиншиврий.

Щурагьиял имам Аьбдуллагь Ацаевлул вяъзалуву бувсунни диндалул ва хIукуматрал идарарттал цачIуну даву дачин даврил республикалий дакьаву дуруччавривусса агьамшивруя. 

Га кьини МахIачкъалалив хьусса «ЦIакьсса кулпат – жяматрал гьану» тIисса форумрал хIасил дурунни Дагъусттаннал Муфтийнал хъиривчу МухIаммад-хIажи МухIаммадовлул.

Муфтиятрал просвещениялул отделданул каялувчи Идрис Асадуллаевлул жагьилтуран насихIат бувну, дакIнин бувтуна элму дусса, дурккусса инсантураща цала ватандалун мюнпат хъунмасса буван бюхъантIишиву.

РувхIанийсса центрданул имам МухIаммад МухIаммадовлул бувсуна бусурманчунал цайми диндалул инсантуращалсса арарду цукунсса бикIан аьркинссарив.

Хъунмасса экрандалий ккаккан дуруна Дагъусттаннал Муфтиятрал дуллалисса давурттая бусласисса ролик: «Инсан» фондрая, РувхIанийсса центрдания, Дагъусттаннаясса имамтурал СВО-лий дуллалисса давурттая, хъаннин кумагрансса «Марьям» тIисса центрдания.

АхIмад-хан Султаннул цIанийсса медаллан лайкь хьунни Луганск шагьрулул имам – Буршиял шяраватусса МухIаммад Саламов, Курск шагьрулул имам Ися Салимсултанов, «Каспий» батальондалул имам МухIаммад Мукьушдибиров, Шарапуттин Мустафаев ва Аьбдуллагь Ибрагьимханов.