Дунияллул рекордрачIан гъанну

Дунияллул рекордрачIан гъанну

Гуж-цIакь бусса спортсмен, ккуличу Султан ХIусмановлул баян бувунни цува Гиннесслул рекорд ккаккан дурсса британец Стив Килердуяр хьхьичIун уккан хIадурну ушиву.

 

Султан ур спортсмен-пауэрли́фтер. Ва хъанай дур кIушивуртту гьаз дувайсса спорт. Ванил мяънагу – инсаннаща шайсса яла захIматмур кIушиву гьаз даву. Султаннул цимилвагу бувгьуну бур хьхьичIунсса кIантту кIушивуртту гьаз даврил бяст-ччаллаву, турнирдаву, пут личавриву ва цаймигу жула миллатирттал спортрал журардаву. 3-ла хьуну ур Дагъусттаннал чемпион.

ХIакьинусса кьинигу Султан ур школалий физкультуралул дарсру дихьлай. ОьрчIру тарбия бавриву бувсса хIарачатрах ва тамансса грамотардан лайкь хьуну ур. Цалами оьрчIругу чан-чанну спортрахун бичлай ур. Арс занай ур лачIун буккаврил секциялийн, душгу цания-ца спорт язи дугьансса пикрилий бур. Ва ишираву яла агьаммур – анавар къабувккун, оьрчIан гьарца чулиннайсса тарбия дуллуну, итххяххан бавур. ЛяличIисса къулагъас дуван аьркинссар жула аьдатирттах ва дин-исламрал тарбиялух.

Лавхъун ур Султан Эльбрусрайнгу. ЧIивинияцIа зунттурду ххирасса, лахънийн лахълай аьдатсса ванал хIукму бувну бур чIявуминнаща лахъан къавхьусса зунттул бакIрайн гьаз хьун. Хасъсса хIадуршингу дакъанура, цащала личIисса дуки-хIачIиягу къаларсун Эльбрусрайн авчуну ур. Ряхра ссятрал дянив ивну ур мицIлийн, цукунчIавсса захIматшиву къархьуну.

Султаннул ца кIиссурах 120 кило дусса кIушиву гьаз дурну, 8 секундрай авцIусса видео ва ванаясса передача дур «Ислам в Лакии» (islamvlakii.ru) порталданий. «Guiness World Records»-рал баян бувну бур Стив Килердул декабрьданул 1-нний, 129 кило ва дачIи дусса пут гьаз дурну, дунияллул рекорд ккаккан дуршиву.

Ванаяр хьхьичIма рекордсмен Беник Исраеляннул 2011-ку шинал ца кIиссурах гьаз дурну дур 121 килограмм. ЦIусса рекорд ккаккан дуван Стив Килер шинал лажиндарай хIадур хъанай ивкIун ур. Гьаннайсса, Султан цува ва рекордрачIан гъанну ушиву баян буллай ур. ЧIа учинну ва цIакь бусса, кьянкьасса чувнан Стивлуяр хьхьичIун уккансса тIайлабацIу.

 

2026-03-01 (Рамазан 1447 ш.) №3.


Лайлатул-Кьадрилул хьхьу

АцIния кIивагу зурдардиву яла ххирамур, даража лаваймур – Рамазан барзри. Мунил хьхьурдардива яла ххирамур хьхьугу – Лайлатул-Кьадрилул хьхьури.   Мугу Рамазан зуруй цумур хьхьу дуссарив мяйжанну къакIулссар. Куннал хьхьичIра-хьхьичIсса хьхьури тIар, куннал ацIния арулку хьхьури...


Ккурандалул юбилей

Уттигъанну МахIачкъала-ливсса «Центр» тIисса ресторандалуву «Лакрансса диндалул кумаг» группалул 5 шинал юбилей кIицI лаглагисса мероприятие хьунни. Ва группа хасну лакрал миллатрансса хъиншиврул, хъинбалдарал ххуллийсса давуртту дуллан хIасул бувну бур ЧиркIайннал...


Мюнпатсса дуаьрду

Мудан заралунния бурувччуну бикIаншиврул   КIюрххил ва гьанттайннай шамилла дуккайссар ва дуаь: باسْمِ اللَّهِ الَّذي لاَ يَضُرُّ مَعَ اسْمِهِ شَيْءٌ فِي الأرْضِ وَلا في السَّماءِ، وَهُوَ السَّمِيعُ العَلِيمٌ «БисмиЛля́гьи ллязи́ ля́ язурру мааьсмигьи́ шай’ун филь-арзи ва ля́...


Байран барча хьуннав!

Ассаламу аьлайкум ва рахIматуллагьи ва баракатугьу! Ххирасса уссурвал ва ссурвал! ДакIнийхтуну барча тIий ура жула ялун нанисса мубараксса Зумаритавал кьини – зумалул, дуаьрдал, эбадатрал, марцIсса тавбалул ва рувхIанийсса дахханашивурттал вибувцIусса Рамазан зурул ахир дуллалисса...


Пикрирдал бакIщаращи

ДакI ва пикрирду аьркин бакъамуния дуруччиншиврул, буруччин аьркинссар чурххал базурду: яру, вичIив, маз, кару, ччанну.   ДакIнивун щугълурду буххайссар мукьва ххуллувух. Цалчинмур – нафсирал гьавасру. Масала, кIирисса кьини зума дургьусса инсаннан дяркъусса щин ккаккарча, му чIумал...