Спортрал бяст-ччаллу
МахIачкъалалив «Лучник» тIисса клубраву хьунни лакрал дянивсса теннисрал ва чIатIаракI ритаврил турнир. Ванил сиптачиталну бувккунни Ккуллал, Лакрал ва ЦIуссалакрал райондал жагьилтурал ккураннал каялувчитал – Гуйдалаев АьбдурахIман, Акаев Жамалуттин ва Къапланов АхIмад.
Турнирдануву гьурттушин дурунни Муфтиятрал зузалтрал ва мизитирттал имамтурал, жагьилтурал ва бугьараминнал. Бяст-ччал баврил агьаммур мураднугу кIицI лавгунни жямат цачIун баву, миллатрал дянив уссушиву цIакь даву.
Уссушиву, дусшиву, дин, маз, тарих буруччаврил агьамшиврун хас бувсса махъру лавхъуна ДучIиннал шяраваллил имам ХIусайнов Мурадлул, Лакрал райондалул имам Баталов ХIабиблул, Муфтиятрал Централ округрайсса вакил Майранов МухIаммадлул.
Цинугу гьурттушин дуван бувкIун бия 100-ннийн бивсса инсантал.
ЧIатIаракI ритавриву цалчинмур кIану бувгьунни ГъазимахIаммадов Шагьрудиннул, 2-мур – Шигьамиров Аьбдуллагьлул, 3-мур – Майранов МухIаммадлул.
Теннисрай цалчинмур кIану бувгьунни Чалаев Сулайманнул, 2-мур Дадукубаев Марислул, 3-мур –Аьлиев СалихIлул.
Дуклаки оьрчIал дянив чIатIаракI риртун ххув хьунни Аьбдуллаев МухIаммад, 2-мур кIану бувгьунни Майранов АхIмадлул, шамулчинмунин лайкь хьунни Оьмаров Юнус.
ЧIатIаракI ритавриву ххув хьусса Ш. ГъазимахIаммадовлул цала дурххусса бахшишрал арцу цадакьалун тIайла дурунни ЦIуссалакрал шяраву буллалисса Сайфуллагь-Кьади Башларовлул цIанийсса диндалул центрданийн.
