Идавс ﷺ макIра ккаккан
Ца инсаннал мизитраву хьуна авкьусса щейхнахь миннат бувну бур:
– Лахьхьин бува ттун макIра МухIаммад Идавс ﷺ ккакканшиврул буван аьркинмур. Дуккайсса дуаь дуссарив ягу цири буван аьркинсса?
– Вил дакIниву гужсса гъира, шавкь духьурча ккаккантIиссар, - увкуну бур щейхнал.
– Дур шавкь, ккаккан хиял бивхьуну ура!
– ХIакьину гьанттайнай ттучIан ухьхьу, на вин лахьхьин банна вила мурад щаллу бансса куц, - увкуну бур аьлимчунал.
Гьанттайн чIумал га адимина увкIун ур щейхнал къатлучIан. Хъамалушин дуван супралух щябивкIун бур. Дукра диркIун дур хъинну цIу чIявусса. ХIачIансса щин дула тIун ивкIун ур хъамаличу, амма щейхнал га щин хIачIангу къаивтун, ялагу дукан увну ур.
– Тти утту ихьу, кIюрххил чаклил чIун дияннин хьхьуниву на ина чантI учин увну, лахьхьин буванна Идавс ﷺ макIра ккакканшиврул буваймур, - увкуну хъамаличунан утту ишинсса кIану ккаккан бувну бур.
Мякьлил инжит увсса адимина бан-бит бакъа утту ивхьуну ур. Хьхьудядизал щейхнал га изан увну, увкуну бур:
– Ттул арс, буси вин цIана макIра ци чIалай дия?
– Гъараллу, жюр-жюр тIисса нехру ва щаращив бия, - дуллуну дур жаваб.
– ЦIана вин щинахсса гъирараха лархьхьусса шавкь Идавсихгу ﷺ хьусса чIумалли вин га макIра ккаккантIисса, - увкуну бур щейхнал.
