Барча хьуннав Кьурбандалул байран!

Барча хьуннав Кьурбандалул байран!

Дагъусттаннал Муфтий щейх АхIмад-афандинал барча баву

 

Ххирасса уссурвал ва ссурвал! ДакIнихтуну барча буллай ура зу бюхттулсса кьини – Кьурбан-байран (Эд аль-АдхIа) дучIаврищал!

 

Ва ххаллилсса кьини жунна дакIнин дагьай кьурбан биххаврийну Аллагьнал ﷻ жухьра дихьлахьисса агьамсса оьрмулул дарсру. Вай гьантрай жухьва мажал буссар Заннахсса ччаву ва дакIмарцIшиву ашкара дурну, жула чIаравминнай аякьа дуллан.

Кьурбан-байрандалул жунма дакIнин бутлатиссар цадакьа баврил даража лахъшиву ва дакIнихтуну Аллагьнал ﷻ рязишиву тIалав даврил агьамшиву. Ва кьини жува ххари бувару каши чанми, гъанминначIан, дустурачIан хъамалу лагару, кумаг аьркинминнал чIарав бацIару, бувсса хъинбаларду кьамул хьуннав тIий дуаьрду дувару.

Аллагьу Тааьланал жунма дакIнин бувтун бур Кьуръандалуву (мяъна): «Зу тачIав къабиянтIиссару Аллагь ﷻ рязи хьунсса даражалийн, зула хъуслива зунна ххирамур хъинбалалул ххуллий харж къадулларча. Зу циксса харж дуварчагу, Аллагьнан ﷻ кIул шайссар» («А́ли Эмран» тIисса суралул 92-мур аят). Вай мукъурттил жувунма гъира бутаннав байрандалул гьантрай хъинбаларду, чIаравминнах къулагъас дуван, хаснува захIматсса тагьарданувуми хъама къабитан.

Азарахъул жула уссурвал ва ссурвал лавгунни мубараксса аьрщарайн, цала агьамсса бурж биттур буван. Тайннал ХIаж Аллагьнал ﷻ кьамул баннав, кьудрат дулуннав ва гьарца бувсса аьмалданух чири чичиннав. ХIажлив дурсса дуаьрду кьамул даннав, дакIру имандалул ва барачатшиврул дуцIиннав, цала фаризагу щаллу бувну, цIуллуну-сагъну зана бикIаннав!

Мубараксса байрандалул кьини Аллагьнахь ﷻ миннат буллай ура жула хIукуматрай ва щалагу дунияллий дакьаву, паракьатшиву хьуннав, Заннал ﷻ цIими чан къахьуннав, бала-апатIру арх баннав тIий.

Ххирасса уссурвал ва ссурвал! ЧIа тIий ура жула циняв кьурбанну, дуаь-эбадатру, хъинсса давуртту кьамул даву! Барча хьуннав Кьурбан-байран!

2026-03-01 (Рамазан 1447 ш.) №3.


Мюнпатсса дуаьрду

Мудан заралунния бурувччуну бикIаншиврул   КIюрххил ва гьанттайннай шамилла дуккайссар ва дуаь: باسْمِ اللَّهِ الَّذي لاَ يَضُرُّ مَعَ اسْمِهِ شَيْءٌ فِي الأرْضِ وَلا في السَّماءِ، وَهُوَ السَّمِيعُ العَلِيمٌ «БисмиЛля́гьи ллязи́ ля́ язурру мааьсмигьи́ шай’ун филь-арзи ва ля́...


Ккурандалул юбилей

Уттигъанну МахIачкъала-ливсса «Центр» тIисса ресторандалуву «Лакрансса диндалул кумаг» группалул 5 шинал юбилей кIицI лаглагисса мероприятие хьунни. Ва группа хасну лакрал миллатрансса хъиншиврул, хъинбалдарал ххуллийсса давуртту дуллан хIасул бувну бур ЧиркIайннал...


ЩяйтIан бахIаймур

Бюхттулсса Аллагь тIий ур (мяъна): «Я Идавс, Кьуръан буклай айишиннин чIа уча Аллагьнахь, инава щяйтIаннуя уручча куну: «Аьузу би-Ллагьи мина-шшайтIани-р-раджим» увкуну, цилгу мяъна хъанахъисса – «на Аллагьнахь ﷻ чIа тIий ура щяйтIаннул оьсса тIуллая уручча тIий нава,...


Аллагьнайн ﷻ таваккул бутаву

Таваккулданул мяъна КIулну бикIияра, таваккул – му паракьатшиву дакъасса гьалакшивур ва гьалакшиву дакъанурасса паракьатшивур. Мунил мяънагу – ина буллугъшиврухгу, мискиншиврухгу ца куццуй уругавур. Щаллуну Аллагьнайн ﷻ вихшала диша, вила оьрму Заннайн тапшур бува щак къаувкуну, му...


“Хайр бакъасса инсантал...”

Инсаннал дакIнил азардавасса ца азар – дакIхъуншивури. Му чIалан дикIайссар, инсантурал тIимур сан къабаврийну. ДакIхъуншиврул дайдихьу – цува цайминнаяр лахъну чIалачIаву. Му иширайн Идавсил ﷺ увкуссар: «КъауххантIиссар Алжаннавун чанссарагу дакI хъун дувайма». Му...