Иблис секьяйда агарбируси?
Иблис секьяйда агарбируси?
Гьачам мижитлавад дураулхъуси Идбаглис гьалабикили саби иблис. Илини хьарбаили сай:
- Эй, лягIнатлизибси, сен бакIилри хIу дила мижитла?
Иблис бикIули саби:
- Ну иша Аллагьли ﷻ бархьибсира. Хьарбаа набзи хIед дигусиличила, нуни жаваб лугас.
БегI гьалаб Идбагли хьарбаили сай:
- Сен хIу дила уммат жамигIятла дехIибайчи башахъес диргала булхъусири?
Иблисла жаваб:
- ХIела уммат мижитлаб жамигIятла дехIибайчи цалабикибхIели, ну руржесбирхIулра. Ил изала уббицIули ахIен бусурманти арбукьяйчи.
ГIур Идбагли хьарбаиб:
- Сен хIуни дила уммат багьуди кайснилизиб ва дугIя бирнилизиб гIелумбилзахъусири?
- ХIела уммат багьуди касес ва дугIя белчIес цахIнабикибхIели, ну гIянцIра сукъурра бирулра, ва ил хIяйчиб кавлулра бусурманти тIинтIбиайчи.
ГIуррара Идбагли хьарбаиб:
- Сен хIу дила умматлис Кьуръан бучIухIели гьалабилзусири?
- ХIела умматли Кьуръан бучIес бехIбирхьухIели, ну цIализиб гъургъашинван бицIусира, жаваб бедиб иблисли.
