МягIничерти далдуцуни
Даршудеш калахъес багьандан
Гьалабван МяхIячкъалала бекIлибиубси майдайчиб халаси мажлис бетерхур.
"Мир вашему дому" ибси уличил дураберкIибси балбуцличи Россияла регионтазибад ва дурала улкназибад бакIибти динна вакилтанира бутIакьяндешдариб. Илдани гьалабси бархIи МяхIячкъалала вузаназир студентуначил конференцияби, гьунибаъниби ва ихтилатуни дурадеркIибтири. Балбуц Дурхъаси Кьуръа аятуначибад бехIбихьиб. Цалабикибтала гьалав Дагъиста муфтий шайх ГIяхIмад Афанди ГIябдуллаев гъайулхъули викIар: "ИшбархIила нушала балбуцли чебиахъули саби даршудешличи ва цадешличи гъира. Бусурмантас дебали мягIничебси саби бархбузни. Цати пикруми гIердурцули, цала-цали хIурматбирулицун нушани улкализибсира, республикализибсира даршудеш мяхIкамбарес дирехIе..."
Илини терактлизиб алхунтала хъалибаргунас гIумра-хIяжлизи путевкаби дедиб. Илкьяйдали хасси дявила балбуцлизиб бутIакьяндеш дирути имамтас ва муфтиятла хIянчизартас пачалихъла шабагъатуни дедиб. Цалабикибтас "Инсан" фондла бузериличила, Динна Центрличила, Идбагла ﷺ дурхъати ваяхIличила видороликуни чедаахъиб.
Балбуцличиб динна гIялимти, имамти ва цалабикибти гIяхIлира гъайбухъун. Цалабикибтачи дугьаилзули ДР -ла миллатла политикала ва динананала къуллукъунала шайчивси министр Энрик Селимович Муслимовли буриб Россия мяхIкамбарес лебилра улкала халкьличи чебси биъниличила.
Шадлихъуни
Республикализир мягIничерти шадлихъуни дурадеркIиб – халкьни-ургарти къачагъунала кьукьни тIутIу-кьякьядарибхIейчирад 25 дус дикнила ва Дагъиста халкьанала цадешла БархIилис хасбарибси балбуц.
ГIядатлибиубливан, байрамла бархIи МяхIячкъалализиб пачалихъла шабагъатуни дедлугнила балбуцра дураберкIиб.
Илизир регионна бекI Сергей Меликовли, СКФО-лизив Россияла президентла шайзивадси вакил Юрий Чайкани, Россияла президентла администрацияла руководительла заместитель МяхIяммадсалам МяхIяммадовли бутIакьяндеш дариб.
ГIур ГIяли ГIялиевла уличилси спортла кIялгIялизиб халкьни-ургарти къачагъунала кьукьни тIутIу-кьякьядарибхIейчирад 25 дус дикнила ва Дагъиста халкьанала цадешла БархIилис хасбарибси балбуц халаси байрамличил дураберкIиб.
Ахъси даража чебаахъиб
"Россияла жагьилти гIялимти" бикIуси динна шайчибси конкурсла гIергъи хIясилти каиб Дагъиста исламла университетлизиб. Динна гIилмулизиб бегIлара гIяхIти декIарбариб. Илизиб бутIакьяндеш дарес биуб исламла вузанала цIакьтигъунти студентуни.
Балбуцла сахаватчебти сиптакартани конкурслизиб чедибдеш сархибтас декIардарилри 3 миллион къуруш арцла. МутагIялимтала гъира мурталра чеимцIати динна багьудлуми кайсниличи биалра, илдигъунти шабагъатунас разихIебиэс хIебирар.
Конкурсличиб чедибдеш сархибти шабагъатлабирнила балбуц "Россия дила тарих" парклизиб бетерхур. Илаб Россияла регионтазибадти муфтийтира, дурала улкназибадти гIялимтира лебри. Ил балбуцлизиб бутIакьяндеш дариб миллатла политикала ва динананала къуллукъунала шайчивси министр Энрик Муслимовли ва республикала динна вакилтанира.
Цаибил мерличи дураухъун Закир Идрисов, МухIяммад-Арифла уличилси
Дагъиста исламла университетла учIан. Илис "Шевролет Монза" автомобилла умхьни дедеб Дагъиста муфтий шайх ГIяхIмад-хIяжи Афандини.
Абзурли жагьилти гIялимта-зибад цаибти 8 мер дуцибти декIарбариб ва илдасра савгъатуни ва арцла шабагъатуни дедиб.
Дурхъати ваяхI
Къизилюртлизир Идбагла ﷺ дурхъати ваяхI гьаладихьиб, гьарил илди чедаэс дигусилис имкан бакIиб ила ваэс. Илди Дагъиста муфтий ГIяхIмад-хIяжи ГIябдуллаевла хъулир дихIули калунти сари.
Дагъистанлантани Идбагла ﷺ дурхъати ваяхIлис хIурматбирули Къизилюртлизи виуси лебил гьуни кьалтинтани кабуцилри. Къизилюртлизир гьаладихьили Идбагла ﷺ дурхъати ваяхI кIел бархIи калун. Ила бакIибтани балбуцлис ва гьаладихьибти ваяхIлис ахъси кьимат кабатур. Кьанси манзилличи бикайчи Идбагла ﷺ дурхъати ваяхI чедаэс дигути камбирули ахIенри.
Гьарил дагъистанланнара бархли имкан лебри илди чедаэс.
Цадешла бархIи
Дагъиста халкьанала цадешла БархIи МяхIячкъалала «Зебра» урчала спортла комплекслизиб «В единстве сила Дагестана» бикIуси халаси байрам бетерхур.
Илар урчала абзани, спортла хIязани, волейболла чемпионат, ва дахъал цархIилтира хIязани детерхур ДР-ла Муфтий ГIяхIмад-хIяжи ГIябдуллаевла призанас.
Илкьяйдали пагьливантала уюнти, биштIатас аниматорти, «Эдми» футболла клубла устадешла дарс ва дахъал цархIилтира далдуцуни чедаэс имкан бакIиб. Илала дурабадра, динна гIялимтала насихIятуни ва
нашидуни зайдухъун. БакIибти-ургар гIумрализи путевкалис чIала бушиб.
Балбуц бетерхур разити аги-хIяйзиб.
