МугIяллимтас хасдарибти назмурти
МугIяллимтас хасдарибти назмурти
БяхIмуд Булатов
ХIурматла мугIяллимти
ДурхIнас гIякьлу буранти
Наслу дагьричеббарес
ГIямру насиб диранти.
ГIарилла гIямрулизир
Багьудила пай лебти
Челябкьла шалабарес
Къарауйчи кайзурти.
Вайси гьарахъбарили
ГIяхIсицун гIеббурранти
ГIякьлу нурван уханти
Дерхъаба учительти!
БиштIатала хIулбазир
Ванал берхIи алкунти
Мургьси гIякьлула гIиниз
Дурхъати учительти.
Гьандиркур ишбархIиван
ВиштIахIелила бурхIни
Нешличил варх хIулкIули
Школализи вякьунти.
Учительницачил ну
Тянишвиубти бурхIни
Цаца хIярпли дурчули
БегI гьалар делкIун дугьби.
ХIела дурсрачи карцIли
БархIи-дуги дуркIаси
Гьар бархIи школализи
ХIу гьанни вашусири.
Нешличиван гIязизли
ХIечи хIерикIусири
ХIела тIамала бакьес
ИштIяхIличил лехIсири.
ГIямрулизир цаибти
ХIуни кайхьибти дурсри
УркIилар сар гьаннара
Дикилихьалра дусми.
Ит замана чарбарес
Се-дигара бираси
ХIела дарсличи кайэс
Гьаннара дигахъаси.
Патимат ГIяллаева
Дугьбала мачилизир
Дургулира дурхъати
Баркалла балахъути
БегIла жагати дугьби
МугIяллимтас дурести
ГIямру дурхIядешличил
Ца гьуникад ихъанти,
БиштIатала уркIбази
Бархьдешла гье белгIенти,
Дерхъаба мугIяллимти!
Гьарахъти урмачирад
ЦIа уркlбази кертlанти,
Гьуцl гьалабяхl башахъес
Дуклумас цlакь луганти,
Дерхъаба мугlяллимти!
Бархибси дунъялизир
Бархьдешла шям алкунти,
Багьудила гlинзурби
ДурхIнази дужахъути,
Дерхъаба, мугIяллимти!
Насибат ХIяжиева
МугIяллимти хIушала
Байрам саби гIяхIбаркьла,
Дусли гьачам башалра
Учительтас дезала!
Гьарил дарслизир гIямру
ХIушани харждирулра,
ДурхIнала уркIби аргъес
Даим къайгъилизирра.
Тетрадунала бекIа
Сабирхъида хIедамси,
Дарсличира ляркьяда
ДурхIначи хIуша карцIли.
Гьардизабгу хIушала
ТалихIла хьуланира,
"Баркалла" ибси девра
ХIушаб ираб мурталра!
Хадижат ГIямарова
АхIерти мугIялимти,
ИшбархIила байрамлис
Гьалаклира аргъахъес
Мубарак хIушаб дила
ГIямрулизиб гьарбизра,
ЧIумаси арадешра,
Хъалибаргла талихIра
БархIилис разидешра.
УркIиларти пикрумби,
Кьасани детурхули.
ХIянчилизир пергерси
ХIуша камли думсули.
Дикалра дусми дахъал
ХъумхIертехIе нушани
Кадихьибти дурсрира
Дяркъур алипунира.
ГIяшли икрам бирулра,
Дурхъати мугIяллимти
Дунъяличиб хIушара
ХIурматличи лайикьти.
