ХIябиб Кьурбановлис – 85 дус
ХIябиб Кьурбановлис – 85 дус
ХIябиб ИсмягIилович Кьурбанов акIубси сай 1938 ибил дуслизив Ахъушала районна Усишала шилизив. Школа таманбарили гIергъи, ил кIел дус букIунни узули калун, гIур медучилищелизи керхур. Цулбала тухтурла санигIят касили, Мордовиялизив узули калун. ГIур ил Дагъистаннизи чарухъун, «Ленинна байрахъ» газетализив, «ЗурхIяб» журналлизив узиб. Литератураличи дигили илини Москвала М. Горькийла уличилси Литературный институтра белчIун. Писательтала Союзла член сай. Илала дахъал жузи дурадухъун: назмурти, поэмаби, хабурти кадерхахъурти. ХIябиб Кьурбановла творчество дигантас илала назмурти гьаладирхьулра.
ХIела-дила далтехIе
ГIур ибхьхIебхьусив гьуни
Нушала ургаб бекIлил,
Урбши дурашан нешла,
Узби дила дулекIла?
Сецад лертира хIуша
Гьар миллатла, гьар шила,
ХIела-дила агарли
ХIердирути даршули?
ХIела-дила ибтала
КIух леб гьанна бурямла
Галгубира, хъулчрира
Хъябладирхъули, хъябла.
Нушаван, ил бурямли
Руржахъули саб зара.
МицIирли калехIе
ШурудикIулра, шукру.
МадирхIудая, узби,
ДебкIахъая шайтIунти.
Илда сар узидешра
ХъалицIара дулъути
ШайтIайчи мурдайибси
ЛайхIекIили калунсив?
БегI ахIерсилизивад
Чи декIарахIерибсив?
Цалар сарли, цалис ца
Диргала дулхъулрара?
Дазу декIарбаралли
Мулк халабаэс вара?
ДекIархIедирутира
Нуша хIурхъара ахъти
Дубуртани саррагу
Нуша цаладирхъути.
Кавказ - ца дубура саб,
Ца ВатIан саб нушала,
Цаван берхIибулхъули,
Цаван диркуси шала.
Къарачай, Осетия,
Къабарда, Ичкерия,
ХIибара, Армения
Дигичердиирая.
Азербайжан, Турция,
ДекIармадиркудая.
Абхазли, Адигейли
КIел някъли някъ буцая.
ГIурра лебси саб марси
ЧебяхIси Г Iярасайра.
ЦахIнаб Кавказ кIапIбиру
Илала ца дукайра.
Ил дукайубван нушаб
РяхIятли бирхIебирар.
Ил дукайурад духъни
Нушаб бебкIали бирар.
Хъяшти нушаб Россия
Халал узигъуна саб,
Иличил барх нушани
Халал кьацI беркунси саб.
Иличилти цадешли
Нушала бекI хIейзахъу.
Ил кумхахIебарибти
ХIедухъар нушала хъу.
ГIярасайлаван гьаргти
Нушаб унза агара,
ХIеберкIахъиб нушази
Дураб цалра дугира.
Тур-тупангла дугьби сар
ХIела ва дила ибти
Нагагь цадарадалли,
«Нушала» детарути.
«Нушала ибсилизир
Лерил диги, давла лер.
Тур-тупанглис, вяв-чIяръайс
ХIебалта ил девли мер.
ХIела-дила далтехIе,
«Нушалацун» дикIехIе.
Даршнали халадиур
Масра мулкра илхIели.
Чум пача пучбиуба
Чула чебла хIехъибти
Тяп цаси тахличиван
ЭмхIечи абатести?
Села пачяхI вируси
Садакьуна урчуси?
Садакьала кьям сай ил
Тахличивра хъярчиси.
Гьанна хIябличибадра
Налог бурчес бехIбирхьур –
Бахъ тIягIямла сабсиван
ЦIудара гIянжила кур.
ГIизрагIилли рухI ахIи,
Алхунси арихалри,
ВебкIибсилизибадра
Налог сайсес хIебири.
Чемабуркъаб нушачи
Индияла гIердирес: -
ХIябразиб хIяб агарли
БебкIибти цIали игес.
Иткъира нуша дигес
Дявти шикьдирули сар,
ДубкIхIедубкIути кьяйда
Дявти агарли декIар.
ХIязван, дунъя бетIили,
Бахъал леб къагъли къунзти.
Жаниварти бетаэс
ВацIурбази бебшибти.
Илцад дунъя бетIибтас
Ахиратра лебси саб, -
Нушаб мер хIебатурли
Лебил ил чусцун буцаб.
ГIяхIла шайчи хIердикIес
ХIулби думсули ахIен,
ЛехIбикIуси уркIила
Я хьул удули ахIен.
