Хала дудешла насихIят
Хала дудешла насихIят
Ца пасихIкар ухънани сунела уршила уршиличил гьаман замана буркIулри. Илини адамла гIямруличила, жанивартачила, арцантачила, тIабигIятла гIяламатуначила хабурти дурулри, алавси жагадеш кьиматлабирахъес бурсивирулри. Уршила иличибли алавси тIабигIятличи, ВатIайчи диги алкIулри.
Хала дудешла хабар:
- Гьарил адамлизир, дила пикрили, жура-журала хIялани дургъути сари. Нуни илди цугдурцули вирус кIел дургъути бецIличил. Ца бецI – вайдеш саби. Илизирти хIялани: кьясдеш, хIясаддеш, сабицун дигахъни, уктемдеш, пахручебдеш, къяна бурни…
КIиибил биалли, гIяхIдеш саби – даршудеш, диги, мардеш, умут, бархьдеш, уркIецIи, сахаватдеш…
ВиштIаси урши илгъуна хабарли тамашавиахъуб ва пикриухъахъун. Камси замана лехIкахъили кали, илини хьарбаиб:
- Хала дудеш, ахирличиб чидил бецI чедибиркуси?
Ухъна пишвяхъили викIар:
- ХIуни гIяхIил балхуси бецI мурталра чедибиркуси саби… Ил багьандан, дила урши, гIяхIти хIяланицун диахъес ва дузахъес вируцад кьасбара, илхIели хIу ЧевяхIсинира гIеввурцури.
