Бурибси чарбарес хIейрар
Бурибси чарбарес хIейрар
МухIяммад Идбаг ﷺ сунела асхIябтачи дугьавилзули викIар:
- Нуни хIушази бегIлара халаси душман чебаахъишав?
- Чебаахъа я Аллагьла Расул ﷺ , - иб илдани. Идбагли ﷺ лезмиличи лишан бариб. Марлира лезми адамла цIакьси душман саби, дахъал балагьуналара, бунагьуналара бекIдеш дуцибси биркIан саби. Абу Бакр асхIябли сунела мухIлилаб биштIаси къаркъа бихули вири, имцIаси гъай хIебурес багьандан. Лезмили адамла багьа кабиркахъу, лезмили багьа имцIабарибси-декIар гьаман къаршихIеркур. Лезмилара, гIягIниагаркъи бурибси гъайла заралличила, нушала диннизибцун ахIи бурули саби. Авал пачали гIелар датурти аманатуни лерти сари. Илди авалра аманат ургидергализибад игьубси ца гъуцгъунти сари.
Хосровли ибсири: «Ну гьачамалра хIебурили калунсиличи пашманвиубси ахIенра. Амма ну, бурибсиличи илцадра пашманвиубти анцIбукьуни диуб, хIятта палдализив ва хIилизив герикIули калунра». Кесарьли иб: «Дила цIакь, хIебурили батурсиличиб имцIаси саби, бурили арбякьунсиличибсиван ахIи, сенкIун хIебурибси нуни гIурра чизилра хIебагьахъурли бихIес вирус, бурибси биалли, цархIилтазибад я дигIянбарес хIейрус, я гIелабяхI чарбарес ахъри агара».
Китайла Хаканни бурибси саби: «Дахъал анцIбукьуназиб бурибсиличи пашманвиъни цIакьси саби, дигIянбарили калунсиличи пашманвиъниван ахIи». Индияла вегIбекIли бурибсири: «Дила мухIлилизибад бурили арбякьунси гьарил дев, дила арилизибад дурабухъунси саби. ХIебурибси дев биалли, дила арилизиб саби. Дигули ахъасли, нуни ил бурес вирус, хIейгули виасли, хIебурили батесра вирус».
