Аллагь ﷻ вагьурси сайри
Арякьун ца бархIи нушачивад ахIмакь адам МяхIяммадла БяхIяммадгIяли. ЧевяхIси Аллагь ﷻ вагьурси, нушала дурхъаси Идбагла ﷺ амру бихули хIериубси, шел урши-рурси абикьурси ва гIямрулизи мерлабарибси.
ХIябцIали дус бурушличир ретаурси рархкьяс, сунела дурхIнала нешлис, къуллукъбариб, дурхIнази ва дурхIнала дурхIнази дазала-дехIибала дагьахъур, гIур биалли сунечил барх се заманара мижитлаб камхIебиахъуб.
БяхIяммадгIяли тIабигIятличи карцIси, хъубзарала бузери лерил гIямрулизиб арбухибси шан адам сайри: Хала хIеркIличибси махьилизив, I0 дус шантала мицIираг хIердирули, калун; дугьаизурси адам мурад хIебарили, гIелавяхI хIерхьиб. Гъайла къантIа, хIялалли гIямру деркIибси, шантачил уржили, вава-кьарван валикибси багьадур сайри.
ГIянручIла Кьулгьу таманбиуб-хIели, муръаличиб илала урши Расулли набзи кагъарла кIапIи гьабуциб.
- Дудешли хIед белкIунси мубарак саби. Ил хьуликIусири хIела вечерличи вакIес ва белчIес. КьадархIебиуб…
ХIердирулра илала виштIаси-лаван белхаагарти хатI. Юх, ну тамашахIейубра, сенахIенну БяхIя-ммадгIялила хъулир дила лерилра жузи лерти сари. Илкьяйда илини гьаман кайсути ва дучIути сарри «АС-САЛАМ» ва «ЗАМАНА» газетаби. ЖумягIла дехIибайчирад дурадухъунхIели, сеннира набчи гъамхIейубли хIевъи ва ца хабар бури: «Ягъари, хIябилра гIяхIдизур урагъан Шайхла мубаракуни. Пагьмучевси адам уили сай. Илала жуз лебси ахIену, лебси биалли, набчи баахъес хIейруду?»
Агара гьанна нуша-ургав ил пергер дубурлан. Азбарлар кали сари хъубзарала гIягIниахъала: дукI-дураз, газа-кьелхIе, уркура, уркурлизи дигьи кIел эмхIе. Чум-чумра адамла мурад бариб БяхIяммадгIялини.
Сунела бунагь-хатIа урдуц! ЧевяхIси Аллагьли ﷻ ахират шаласи бедаб, Алжунтази хьуравараб!
БЯХIЯММАДГIЯЛИЛА МУБАРАК
Ассаламу гIялайкум,
БяхIяммадла Ибрагьим!
Адаб, ламус, тIабигIят
ХIекьли далдикиб кIишан.
Шараб шинван умути,
Мирхъила шалигъунти,
Варъали тIемдикIути
Шадли гIямру деркIаби!
ГIякьлулис гIибратчевли
Даим мякьлав калаби!
МалхIямли гъайикIули,
Бахъла уркIби дираби!
ГIяламлис даэсицад
Лерти сар хIезир дагьри,
ГIямрулизив мурталра
ГIяхI барес гьуцIси дарган.
КIишала халкьла хабар
АхъбикIахъули гьаман,
Кулпетличил хIулкIули
ХIериаби гьар заман!
Нуни бахъал хIебалас
Нушала миналичиб,
Шантачи уркIецIила
ХIугъунти багьадурти.
Хайдакь, муйра-сирхIязиб
Хабар чIакаван урцаб!
ХIярам, хиянат биран
Я хIечил цугвикмайкаб!
Кагибил белкI лукIуси,
ГIилмула мар мугIяллим,
Шантас дезаикIуси,
Пагьмучев Лукьман-ХIяким.
Нушала миналичиб
ГIурра алкIаб хIугъунти!
Цинала дубураван
Адаб-хIяялис ахъти!
Калаби чарх арали
ДейбукIла шурла лесван.
Дарданира детихъаб
Савлила пухI дирихьван.
Гьундурачив гIямрула
Гьарахъли ганзикIаби!
ГьалавяхIцун вашули,
ХIулкIули ахъикIаби!
ХIервараби Аллагьли ﷻ
ХIедагьахъурли анцIкьи.
Чарх-бекIлизив арали,
ХIеберки цалра дарман!
ХIечи гIяхIладли башаб
ХIугъунти марти гъубзни!
Илдас хинкIи дирахъес
Шалайра шулгIир калаб!
Иш дунъяличив левай
Я излума маргаби!
Итил дунъяличивра
Алжайзив къунзикIаби!
