Давла

Гьачам давлачевси адамли сунела виштIаси урши сунечил варх шилизи укес кьасбарили сай, мискинти адамти секьяйда хIербирулил чебаахъес багьандан.

Илди хIяйванти адилкьули бузути адамтачиб жумягIцадхIи хIербирули калун. Хъули чарбухъунхIели дудешли уршилизи хьарбаиб илис архIя гIяхIбизурал.

-- Пергерла шадибгьуни бетаур, дудеш! - викIар урши.

-- Се гIяхIбизура хIед итаб? Се чебаири хIуни нушала агарси?

-- Дудеш, нуни чебаира илдала авал хя, хIяйван-къача, мазала мас терни, нушала ца хя лебхIели. Нушала бассейн биалли, илдала ахирагарси хIеркIра шарара. Нушала хъали жагаси биалра, илдала хъулрала хъалчличибад лебилра алавчарси тIабигIятла жагадеш чебиулри. Нушала хъа гьалаб анхъ саби, илдала биалли, хъулри-алав вава-кьарла шиниша авлахъуни сарри. Нушани дугели азбар шалабарес чиргъми улкахъухIели, илдала биалли бацли ва зубартани шалабирулри.

Илгъуна жавабличи хIерли ахIенси дудеш гъай агарли хIякизур.

Уршили имцIабариб:

-- Баркалла дудеш, наб гIяхIси бузерила адамти ва жагати мер-муса чедаахънилис. Гьанна нуни баласра гьарли-марли давлачебти адамти сегъунтили бирутил.