Муфтий, ДР-ла имамтала Советла председатель, шайх ГIяхIмад-Апандини улкала халкь дурхъаси Рамазан базличил мубаракбариб
«Ассаламу гIялайкум ва ряхIматуллагьу ва баракатугьу! ХIурматла узби ва рузби, уркIиуркIиларад мубаракдирулрая дурхъаси Рамазан базличил – гIибадат имцIабирнила, ряхIму-уркIецIила ва гIяхIдешла манзилличил! Кьудратла ВегIла ряхIмуличил, нушани къияндешуни дяхIаурра. Ириъ, иш манзил бехIбихьибси коронавирусла чейхъуси изай бахъал нушала гъамти-тухумтала жан къябаиб. Дурхъаси БелкIлизиб бурни хIясибли, гьарил къияндешлис гIергъи кункдешра лябкьуси саби, ЧевяхIсила икьайчил багьла-багьлали гьар секIал мерлакадирули сари. ИмцIати регионтазир мижитуни абхьнилис, ЧевяхIсилис шукру бирулра. АхIерти узби ва рузби, ну вирхулра, заманала къияндешуначи хIерхIеили, дурхъаси Рамазан бакIили нушала хъулри ва уркIби разидешли дирцIниличи, Нушала ВатIайс эркиндеш, баракат савгъатдирниличи, уркIецIи имцIабирниличи, нушала уркIби малхIямдарили, илди имай ва Аллагьличи ﷻ таваккалли дирцIниличи.
Рамазан – ил пашманиънила ва бяркъла, вирхнила ва разидешла, сабурла ва мукIурдешла, уркIецIила ва гIяхIбаркьла, цадешла ва балгундешла баз саби! Ил базлизив дуббурцнили, ЧевяхIсила уркIецIиличил нуша рухIлашалси умудешличи гъамдирехIе. ЧевяхIсилизи тиладибирулра, гьарил дуббуцарла бархIи нушаб лебтасалра уркIецIира баракатра гахъес. Илкьяйдали Кьудратла ва РяхIмула ВегI Аллагьлизи тиладибирулра нушала дуббуцари, гIяхIти баркьудлуми, таравихIла дехIибала кьабулдарахъес ва кIелра дунъяличир талихI ва ряхIятдеш дархьахъес! Садакьали адамла давла камбируси ахIен, иличи ургIебли, гьатIира имцIабируси саби. ХIебиалли, даширая, Рамазан гIяхIбаркьлизиб абзбикIнила баз саблин адамтас гIяхIдеш ва разидеш савгъатдирули, ЧевяхIсила разидеш сархехIену. Кьудратла ВегIли кумекбараб нушаб ишди бурхIни гIибадатлизир деркIахъес, нушала баркьудлуми ва балгадугIя чархла ва рухIла умудешлис сабабли диаб. Амин».
