ГIябидла насихIят
Ца гIябид гамиличи кайили сапарличи дуравхъун. Илабти адамти ил чеили, чус насихIят бурахъес иличи ярга-яргали гъамбирулри. Амма илини гьарил гъамиубсилизи цадехI дугьби сарри дурути: «Багьи, хIела ахир чараагарли лябкьуси саби, бебкIаличила хъуммартид!» Илди дугьбачи пикри бяхIчииуси адам биалли, илав рахлира аги.
БахъхIи агарли урхьуличиб цIакьси бурям бухъун ва гами ита-иша булкIес бехIбихьиб. Матросунира илабти лебил адамтира бебкIализибад урухбиубли, кьукьмусбикили ЧевяхIсиличи кумекбарахъес, балга-дугIяличил дугьабилзесбяхIиб. ГIябид биалли, левси мерлавад вяшхIевхъи, сунела пикрумази мурхьикили сайри. УркIбухъи адамти иличи бетухъун ва бурям чебарбукахъес Аллагьлизи тиладибарахъес тиладибикIесбииб. ИлхIели гIябид някъбира гьадуцили, закличи хIерикIули, ЧевяхIсиличи дугьаизурли, тиладиикIесвяхIиб. Агь, тамаша! ДягI камбиуб, дирихьмиургабад берхIи гьаббакIиб ва багьла-багьлали урхьу ряхIятбиуб. Гамиличибти чебсаргъили, паргъатбиубли гIябидлизи хьарбикIесбииб: «Марлира, кахси бурямла манзил хIу бебкIализивад уруххIейубрив? Илкьяйда авараагарли сен-сен виэс вирусири?»
«Гьайгьайрагу, гьар бархIила гIямрулизирра нуша бебкIаличирад гьарахъти ахIенра ва гьар минутлизирра дебкIес дирутира. Гьар секIал ЧевяхIсила някъбазир сари ва Илиницун саби кабилзахъуси нуша дубкIуси манзил. Илини нушаб гибси замана селилра барсхIебиру, дунъяличиб бегIлара цIакьси бурямли дунъя убил-чебаралра. ДекIардеш агара хIу чинав виадлира, урхьначив яра дубуртачив, хIела гIямрула бурхIни ЧевяхIси Кьудратла ВегIла арилизирцун сари. Илини ахIенси чилилра селра барес хIейрар, чIянкIли хIядурли виъни ахIенси, илис сайри ну паргъатси. БебкIаличила хъумхIертусилис ва иличи хIядурикIусилис, бебкIалис гIергъиси манзил иш дунъяличиб гIяхIси саби. Илис сайри ну викIуси: бебкIаличила хъуммартидая или, илхIели дахъал масъулти гьамадли арзес вирар.
АСХIЯБТАЛА ХАБУРТАЗИБАД
